Interpol qidiruvida bo‘lgan o‘zbekistonlik Tailandda ushlanib, O‘zbekistonga deportatsiya qilindi

Interpol Toshkent va Bangkok Milliy markaziy byurolarining hamkorlikdagi sa’y-harakatlari natijasida Interpol kanallari orqali xalqaro miqyosda qidiruv e’lon qilingan ayblanuvchini deportatsiya qilish masalasi hal etildi.

Foto: INTERPOL

Islom Karimov nomidagi xalqaro aeroport hududida Milliy markaziy byuro xodimlari tomonidan Tailand Qirolligidan deportatsiya qilingan O‘zbekiston fuqarosi X.K. ushlandi, deb xabar berdi O‘zbekistondagi Interpol Milliy markaziy byurosi.

Xabarga ko‘ra, u O‘zbekiston huquqni muhofaza qilish organlari tomonidan o‘ta yirik miqdordagi firibgarlikda ayblanib, xalqaro qidiruvda bo‘lgan. Ushbu holat yuzasidan jinoyat ishi qo‘zg‘atilgan, ayblanuvchi chet elga qochib, tergovdan yashiringan va xalqaro qidiruvga e’lon qilingan.

“Interpol kanallari orqali Tailand huquqni muhofaza qilish organlari bilan muvofiqlashtirilgan hamkorlik harakatlari natijasida, qidiruvdagi shaxs Tailand hududida ushlandi va keyingi tergov tadbirlarini o‘tkazish uchun O‘zbekiston Respublikasiga deportatsiya qilindi”, deyiladi xabarda.

Tayyorlagan: Kun.uz Admin

#Interpol #Tailand