Sanepidqo‘mita o‘limga olib keluvchi muzqaymoq haqidagi xabarga ishonmaslikka chaqirdi

Sanepidqo‘mita ijtimoiy tarmoqlarda tarqalgan o‘limga olib keluvchi muzqaymoq haqidagi xabar asossizligini bildirdi.

“Ijtimoiy tarmoqlarda tarqatilgan “xavfli muzqaymoq” haqidagi video mutlaqo asossiz. So‘nggi yillarda O‘zbekistonda muzqaymoq iste’molidan zaharlanish yoki og‘ir salbiy holatlar qayd etilmagan”, deyiladi xabarda.

Ma’lum qilinishicha, barcha muzqaymoq mahsulotlari tegishli tashkilotlar nazorati va laboratoriya sinovlaridan o‘tadi. O‘zbekiston oziq-ovqat xavfsizligi bo‘yicha xalqaro standartlarga amal qiladi.

“Fuqarolarni yolg‘on xabarlarga ishonmaslikka, faqat rasmiy manbalarga tayanishga chaqiramiz. Muzqaymoqni faqat rasmiy savdo shoxobchalaridan va xavfsizlik hujjati bilan xarid qiling”, deyiladi Sanepidqo‘mita axborot xizmati xabarida.