«Istanbul Boshoqshehir» nihoyat Abbosbek Fayzullayev transferi uchun TsSKAga pul o‘tkazishga muvaffaq bo‘ldi

Turkiyaning «Istanbul Boshoqshehir» futbol klubi O‘zbekiston milliy jamoasi yarimhimoyachisi Abbosbek Fayzullayev transferi uchun Moskvaning TsSKA klubi hisobiga pul o‘tkazdi. Bu haqda TsSKA klubining kommunikatsiyalar bo‘yicha direktori Kirill Breydo ma’lum qildi.

Istanbul klubi iyulda Abbosbek Fayzullayev bilan besh yillik shartnoma imzolagandi. Jurnalist Usmon Altunterimning ma’lumot berishicha, transfer summasi 7 mln yevroni tashkil etgan.

Avvalroq Turkiya klubi Fayzullayev transferi uchun mablag‘ o‘tkazishda muammolar yuzaga kelgandi. «Istanbul Boshoqshehir» vakili muammo pul yetishmovchiligida emas, balki pul o‘tkazishda bo‘layotganini aytgandi.

«Abbos Fayzullayev transferi uchun shartnomada ko‘rsatilgan mablag‘ klubimiz hisobiga kelib tushdi. Endi kelishuv to‘la amalga oshdi», — deyish mumkin dedi Breydo.

Ma’lumot uchun, Abbosbek Fayzullayev katta futboldagi faoliyatini 2021 yilda Toshkentning «Paxtakor» klubida boshlagan. 2023 yilda Moskvaning TsSKA klubi uni 500 ming yevroga transfer qilgandi. Futbolchi Moskva klubida ikki mavsum davomida barcha turnirlar doirasida 72 uchrashuvda ishtirok etib, 8 gol urdi va 11 golga uzatma berdi. U yakunlangan mavsumda moskvaliklar jamoasi bilan Rossiya Kubogi va Superkubogini qo‘lga kiritgandi.