Toshkent va Buxoro viloyatlarida o‘qishga kiritib qo‘yish bilan bog‘liq firibgarlik holatlari aniqlandi

Departamentning Ohangaron shahri bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda "I.Y.'' nodavlat oliy ta’lim muassasasi bo‘lim boshlig‘i B.A. 4 nafar fuqaroni ushbu oliygohga 3-kursdan o‘qishga kiritib qo‘yishi evaziga har biri uchun 1 000 AQSh dollari berishi kerakligini aytib, jami 4 000 AQSh dollarini olgan vaqtida ashyoviy dalillar bilan ushlangan.

Departamentning Piskent tumani bo‘limi, DXX va IIB xodimlari hamkorligida o‘tkazilgan tezkor tadbirda fuqarolar J.E. va B.A. fuqaro K.X.ning ishonchiga kirib, uni go‘yoki Toshkent davlat iqtisodiyot universitetida ishlovchi tanishlari yordamida mazkur universitetga o‘qishga kiritib qo‘yishi evaziga 2 000 AQSh dollarini olgan vaqtida ashyoviy dalillar bilan ushlangan.

Shuningdek, Departamentning Buxoro shahri bo‘limi va IIB xodimlari hamkorligida o‘tkazilgan tezkor tadbirda fuqaro A.I. fuqaro N.Sh.ning ishonchiga kirib, Qirg‘izistondagi oliy ta’lim muassasasida o‘qiganligi to‘g‘risida hujjat rasmiylashtirib, go‘yoki ta’lim muassasalari qabul komissiyasida ishlovchi tanishlari orqali Buxoro innovatsion tibbiyot institutiga 3-kursdan o‘qishga kiritib qo‘yishi evaziga 3 000 AQSh dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.