Saudiya Arabistoni “qorsizlik” sababli 2029 yilgi Qishki Osiyo o‘yinlarini boshqa mamlakatda o‘tkazishni so‘ramoqda – OAV

Saudiya Arabistoni qor topishda qiyinchilikka duch kelgani bois 2029 yilgi Qishki Osiyo o‘yinlarini o‘tkazishni so‘rab Xitoyga murojaat qildi, deb xabar berdi Bloomberg.

Xabarga ko‘ra, Saudiya Arabistoni va Osiyo Olimpiya kengashi musobaqalarni o‘tkazish bo‘yicha boshqa mamlakatlar bilan muzokaralarni boshlagan.

Bu o‘yinlar o‘tkazilishi mo‘ljallangan Trojyena tog‘-chang‘i kurorti qurilishida yuzaga kelgan muammolar bilan bog‘liq.

Qayd etilishicha, saudiyaliklar Xitoy bilan norasmiy muzokara o‘tkazgan.

Trojyena kurorti deyarli hech qachon qor yog‘maydigan sahroda qurilmoqda va qishki o‘yinlar o‘tkazish uchun sharoit yaratish – suv olib kelish, sun’iy ko‘llar va qor hosil qilish o‘ta qiyin muhandislik yechimini talab qiladi.

Saudiya Arabistoni bu qurilishga bir necha o‘n milliard dollar sarfladi, ammo hozirda neft narxi tushishi va budjet taqchilligi tufayli moliyaviy qiyinchiliklarga duch kelmoqda.

So‘nggi Qishki Osiyo o‘yinlari 2025 yil fevralda Xitoyning Harbin shahrida o‘tkazilgandi.