“Rahbarlarda jazolanishdan qo‘rqish hissi yo‘q” – vazir va hokimlarning ish tutumlari haqida suhbat

Madaniyat vaziri Ozodbek Nazarbekov yana bir bor reklamada ko‘rinish berarkan, jamoatchilik e’tirozlariga sabab bo‘ldi. Vazirlik vazirning reklamasini – “ijtimoiy foydali axborot” deya ta’rifladi. Kun.uz bilan suhbatlashgan faollarga ko‘ra, rahbarlarda jazolanish hissi yo‘q, chunki oddiy fuqaroga ishlaydigan qonunlar vazir-u hokimlarga kelganda ishlamay qoladi.

{Yii::t(}

O'tkazib yuborish 6s

O'tkazib yuborish

Ma’lum bo‘lishicha, Ozodbek Nazarbekov shu yilning aprelida Andijondagi xususiy universitetga borgan chog‘ida videoga tushib, hammaga ushbu OTMni tavsiya qilgan. Qonunchilikka ko‘ra esa, davlat amaldorining ma’lum mahsulotni xalqqa tasdiqlab berishi – mumkin emas.

Bundan avval, 2024 yilda Nazarbekov erkaklar kiyim do‘koni reklamasiga tushib, buni ham milliy brend deya maqtab, noqonuniy chiqishi bilan muhokamalarga sabab bo‘lgandi. Reklama bozori regulyatori bo‘lgan Raqobatni rivojlantirish va iste’molchi huquqlarini himoya qilish agentligi esa vazirda ayb yo‘qligi aytib, do‘konni jarimaga tortgandi.

O‘shanda ham vazirlik bu reklama emasligi, hech qanday moddiy manfaat ko‘zlanmaganini aytib, Nazarbekovni oqlagandi.

Kun.uz bilan suhbatlashganlar fikricha, rahbarlarning jazolanish hissi yo‘qligi va jazolanmaslikka bo‘lgan ishonchi – qonunsizlik va huquqiy hujjatlarning ishlamasligi bois ortib bormoqda.

“Qonunda moddiy manfaat, shartnoma degan bandlar yo‘q. Bu qonunlarning xor bo‘lishi, chunki jamiyatimizda qonunlar odamiga qarab ishlash tempiga o‘tgan. Nazarbekovning reklamaga tushib, jazo olmasligi boshqaruvdagi kemtiklarni yaqqol ko‘rsatadi”, deydi inson huquqlari faoli Abdurahmon Tashanov.

Jamiyatshunos Hamid Sodiq fikricha, hech bo‘lmasa yuqoridan biror tanqid yog‘dirilmagani, jamoatchilik ko‘zi uchun bo‘lsa ham vazirning jazolanmagani bu keysda eng e’tibor qaratilishi kerak bo‘lgan nuqta.

“Agarda ommaviy qonunlar ishlamasa ham siyosiy rejim mustahkam turgan bo‘lsa – bu yerda boshqa qonunlar ishlaydi. O‘zbekistonda ildizi byurokratiyaga borib taqalmaydigan yagona vazir – Ozodbek Nazarbekov. U shou-biznesdan chiqqan va Madaniyat vazirligi davlat siyosatini reklama qiluvchi asosiy tashkilot ekani bois qaysi reklama tijoriy, qaysinisi siyosiy ekanini ajrata olmaydi. Shuning uchun ham u bunday holatlarga duch kelaveradi”, deydi Hamid Sodiq.

Etnopsixolog Mahmud Yo‘ldoshevga ko‘ra, vazir ushbu masala keng muhokama bo‘lganidan keyin o‘zi shaxsan chiqib bunga munosabat bildirishi kerak edi.

“Madaniyat so‘zining ta’rifi juda ko‘p, ma’naviyati buzilgan madaniyat vaziri shunday holatda o‘zi chiqib bunga munosabat bildirishi kerak edi. Qonuniy ishlab, shunday holatlar yuz berganda o‘zidan bilib iste’fo bergan biror vazirni ko‘rmadik. Prezident bularning og‘zini yopib olmagandir, hozirgi holatda birinchi bo‘lib balki Nazarbekov iste’fo berar?” deydi etnopsixolog Yo‘ldoshev.

Umuman olganda madaniyat vaziri bilan sodir bo‘lgan reklama mojarosi ortidan hukumat a’zolari, O‘zbekistondagi barcha vazirlarning aholi, jamoatchilik va matbuot bilan aloqalaridagi bo‘shliqlar, tajribaning yo‘qligi ko‘rinadi.

Ayniqsa, so‘kong‘ich va har xil noqonuniy topshiriqlar beradigan hokimlar, pora bilan qo‘lga tushuvchi organ xodimlari oldida madaniyat vazirining reklama mavzusi – “desertga o‘xshaydi”. 

Shohrux Majidzoda suhbatlashdi.