Uy-joy sotib olishda keshbek va otaga aliment to‘lamagan farzandlarning jazolanishi – mahalliy dayjest

Qurilish sektorida yashirin iqtisodiyotning ulushini kamaytirish maqsadida uy-joy sotib olishda keshbek joriy etilishi mumkin. Xorazmda keksa otasini moddiy ta’minlamagan farzandlar jinoiy jazoga tortildi. Soliq qo‘mitasi 100 mln so‘m kompensatsiya haqidagi yolg‘on xabarlardan ogohlantirdi. Kun.uz yoritgan ushbu va boshqa muhim mahalliy yangiliklar bilan tanishtiramiz.

{Yii::t(}

O'tkazib yuborish 6s

O'tkazib yuborish

Uy-joy sotib olishda keshbek joriy etilishi mumkin

Qurilish sektorida yashirin iqtisodiyotning ulushini kamaytirish maqsadida jismoniy shaxslarga oldi-sotdi bitimi summasidan 5−6 foiz keshbek joriy etilishi mumkin.

Qayd qilinishicha, hozir uy-joylarning atigi 10 foizga yaqini qo‘shilgan qiymat solig‘i bilan, qolgan 90 foizi esa soliqsiz sotib olinyapti. Yangi tartib vaziyatni o‘zgartirishiga umid qilinmoqda, chunki xaridorlar keshbek olish maqsadida quruvchidan hisob-faktura talab qilishi mumkin.

Xorazmda keksa otasini moddiy ta’minlamagan farzandlar jinoiy jazoga tortildi

Ota 3 nafar farzandini sudga berdi. Farzandlar sud qarori bilan otasining ta’minoti uchun har biriga belgilangan oylik – 130 ming so‘m aliment pulini to‘lamay kelgan.

«Turmush o‘rtog‘im vafotidan keyin farzandlarim meni yolg‘iz tashlab qo‘ydi. Axir men ularni tug‘ilganidan voyaga yetguniga qadar parvarishlaganman», dedi otaxon sudda.

O‘zbekiston qonunchiligida voyaga yetgan shaxslarning mehnatga layoqatsiz va moddiy yordamga muhtoj bo‘lgan ota-onani moddiy ta’minlashdan bo‘yin tovlaganligi uchun javobgarlik belgilangan.

Soliq qo‘mitasi 100 mln so‘m kompensatsiya haqidagi yolg‘on xabarlardan ogohlantirdi

Internet tarmog‘idagi soxta veb-sayt orqali O‘zbekiston fuqarolariga 100 mln so‘mgacha kompensatsiya to‘lab berilishi haqida Soliq qo‘mitasi raisi nomidan xabar tarqalmoqda.

Soliq qo‘mitasi ushbu xabarlar haqiqatga to‘g‘ri kelmasligi va feyk ekanini ma’lum qildi. Qonunlar, hukumat qarorlari va boshqa normativ-huquqiy hujjatlar faqat rasmiy manbalar orqali e’lon qilinadi.

Mehnatga layoqatli aholi soni 21 milliondan oshdi

Milliy statistika qo‘mitasi ma’lumotlariga ko‘ra, O‘zbekistonda 12,2 million kishi (32,2 foiz) mehnatga layoqatli yoshdan kichik, 21,2 million kishi (56 foiz) mehnatga layoqatli yoshda va 4,5 million kishi (11,8 foiz) mehnatga layoqatli yoshdan kattadir.

Ekspertlarning ta’kidlashicha, mehnatga layoqatli aholining yuqori ulushi mamlakat uchun «demografik bonus» bo‘lib, iqtisodiyotni yanada rivojlantirish va O‘zbekistonda keng ko‘lamli islohotlarni amalga oshirish uchun muhim manba hisoblanadi.

Toshkentda virusli dastur yaratib, odamlarning pulini o‘g‘irlagan jinoiy guruh qo‘lga olindi

Toshkent shahrida “apk” viruslarini yaratib, fuqarolarning pul mablag‘larini o‘g‘irlash bilan shug‘ullanib kelgan jinoiy guruh qo‘lga olindi.

Ushlangan shaxslarning telefon qurilmalari tekshirilganda, ular 133 nafar fuqaroning jami 3 mlrd so‘mga yaqin pul mablag‘ini qo‘lga kiritgani aniqlangan. Jinoiy guruhning har bir a’zosi o‘g‘irlangan puldan ulush olgan.

Qayd etilishicha, hozir jinoiy guruhga aloqador bo‘lgan boshqa shaxslarni aniqlash bo‘yicha respublika bo‘ylab tezkor-qidiruv tadbirlari davom ettirilmoqda.