Toshkent viloyatida bola o‘g‘irlashga urinish bo‘lgani aytilgan video haqiqatga to‘g‘ri kelmasligi ma’lum qilindi

Toshkent viloyati Yuqori Chirchiq tumanida bola o‘g‘irlash bilan bog‘liq holat kuzatilmagani va shu mazmunda tarqalayotgan xabarlar mutlaqo haqiqatga to‘g‘ri kelmasligi ma’lum qilindi.

Viloyat IIBBning bildirishicha, 9 sentabr kuni Yuqori Chirchiq tumani «Taraqqiyot» mahallasida yashovchi voyaga yetmagan shaxs yaqinlariga aytmasdan boshqa mahallada yashayotgan do‘stining uyiga ketgan. Oradan vaqt o‘tib qarindoshlari uni topganda noqulay vaziyatdan chiqish uchun “meni o‘g‘irlab ketmoqchi bo‘lishdi” degan mazmunda gapirgan va buni eshitgan yaqinlari ichki ishlar organlariga xabar bergan.

Shu vaqtning o‘zida olib borilgan o‘rganishlar natijasida tuman hududida bu kabi holat kuzatilmagani va bola yaqinlari dakki berishidan cho‘chib yolg‘on gapirgani ma’lum bo‘lgan.

Xabar qilinishicha, tuman IIB mas’ullari tomonidan bola va uning yaqinlari bilan profilaktik suhbat o‘tkazilib, bu kabi harakatlarning huquqiy oqibatlari tushuntirilgan.