«Toshkent - Xatirchi» yo‘nalishida yo‘lovchi tashuvchi korxonaga noqonuniy undirilgan 710 mln so‘mni yo‘lovchilarga qaytarish majburiyati yuklandi

«Toshkent — Xatirchi» (Navoiy viloyati) yo‘nalishida avtobusda yo‘lovchi tashish xizmatini ko‘rsatuvchi MChJga sotilgan chiptalar uchun ortiqcha undirilgan 710 mln so‘mni yo‘lovchilarga qaytarish majburiyati yuklandi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar berdi.

Ma’lum qilinishicha, huquqni muhofaza qiluvchi organlar tomonidan qo‘mitaga kiritilgan hujjatlarga ko‘ra, fuqaro O‘.Ch.dan “Toshkent-Xatirchi” yo‘nalishida avtobusda yo‘lovchi tashish xizmatini ko‘rsatuvchi korxona tomonidan yo‘lkira uchun ortiqcha haq undirganligi holati aniqlangani bildirilgan.

“Qo‘mita 2022 yilning 22 avgustidan 2025 yilning 31 martigacha bo‘lgan davrda mazkur jamiyatga tegishli avtobuslarning «Toshkent — Xatirchi» yo‘nalishini o‘rganib chiqdi. O‘rganishlarda aholiga chipta sotishda qonun talablariga zid ravishda, ya’ni chipta sotish jarayonida qo‘shimcha xizmatlardan foydalanishga qistash va ko‘rsatilmagan xizmatlar uchun haq olish alomatlari aniqlanib, o‘rganilgan davrda amalga oshirilgan qatnov bo‘yicha 74 419 ta yo‘lovchiga sotilgan chiptalar uchun 710 mln so‘m ortiqcha haq undirish ehtimoli mavjudligi aniqlandi”, deyiladi qo‘mita xabarida.

Maxsus komissiya tomonidan belgilangan tartiblarga muvofiq ish qo‘zg‘atilib, mazkur MChJga ortiqcha olingan mablag‘larni iste’molchilarga qaytarish yuzasidan ko‘rsatma berildi.