Tungi iqtisodiyot, isitish mavsumida moddiy yordam va yoshlarga foizsiz qarz – mahalliy dayjest

Yangi Toshkent hududida Peterburg mavzesi barpo etiladi. Isitish mavsumida ehtiyojmand oilalarga 1 mln so‘mdan bir martalik yordam beriladi. Savdo, xizmat ko‘rsatish va ko‘ngilochar sohalarning tungi vaqtda ham to‘siqsiz faoliyat ko‘rsatishi kafolatlanishi belgilanadi. Yoshlarga foizsiz qarz beriladi. Nukusdagi dala o‘quv maydonida yuz bergan portlashda 10 ga yaqin harbiy xizmatchi jarohatlandi.

{Yii::t(}

O'tkazib yuborish 6s

O'tkazib yuborish

Yangi Toshkent hududida «Peterburg mavzesi» barpo etiladi

Shavkat Mirziyoyev Rossiyaning Sankt-Peterburg shahri gubernatori Aleksandr Beglov boshchiligidagi delegatsiya bilan ushbu va boshqa masalalarni muhokama qildi.

Rossiya delegatsiyasining bu galgi tashrifi chog‘ida metallurgiya, uskunasozlik, yo‘l qurilishi, farmatsevtika va sog‘liqni saqlash, oziq-ovqat sanoati, qishloq xo‘jaligi, logistika hamda boshqa sohalarda 23 ta kooperatsiya loyihasini amalga oshirish bo‘yicha «yo‘l xaritasi» qabul qilindi.

Poytaxtda Ishbilarmonlik markazi faoliyatini yo‘lga qo‘yish, shuningdek, Yangi Toshkent hududida «Peterburg mavzesi»ni barpo etish loyihasini tayyorlash ishlari olib borilayotgani qayd etildi.

Tungi iqtisodiyotni rivojlantirishga oid loyiha e’lon qilindi

Strategik islohotlar agentligi prezidentning tungi iqtisodiyotni rivojlantirish chora-tadbirlari bo‘yicha qarori loyihasini tayyorladi.

Hujjatga ko‘ra, savdo, xizmat ko‘rsatish va ko‘ngilochar sohalarning tungi vaqtda ham to‘siqsiz faoliyat ko‘rsatishi kafolatlanishi belgilanadi.

O‘zbekistonda tungi vaqtda faoliyat yuritadigan ko‘chalar aholi soni 50 mingdan oshgan shaharlarda tashkil etiladi. Ushbu ko‘chalarda filialini ochgan tadbirkorlik sub’yektlari moliyaviy qo‘llab-quvvatlanadi va ayrim xarajatlari qoplab beriladi. «Tungi iqtisodiyot menejeri» lavozimi joriy etiladi.

Isitish mavsumida ehtiyojmand oilalarga 1 mln so‘mdan bir martalik yordam beriladi

2025-2026 yilgi isitish mavsumida ehtiyojmand aholini qo‘llab-quvvatlash maqsadida joriy yil noyabr oyida 1 mln so‘m miqdorida bir martalik moddiy yordam beriladi.

Ijtimoiy himoya milliy agentligining ma’lum qilishicha, yordamni «Ijtimoiy himoya yagona reyestri» orqali bolalar nafaqasi yoki moddiy yordam oluvchi oilalar, «Kambag‘al oilalar reyestri»dagi oilalar, «Mahalla yettiligi» tomonidan shakllantirilgan qo‘shimcha ro‘yxatga kiritilgan oilalar olishi mumkin. Shuningdek, qo‘shimcha toifadagi fuqarolar (boquvchisini yo‘qotgan, I yoki II guruh nogironi bo‘lgan a’zosi bor, nogironligi bo‘lgan bolani parvarishlayotgan va boshqalar) ham olishi mumkin.

Buning uchun joriy yil 25 sentabrga qadar «Mahalla yettiligi»ga murojaat qilish lozim.

Yoshlarga foizsiz qarz beriladi

O‘zbekistonda yoshlarning turli loyihalarini moliyalashtirish uchun foizsiz qarz beriladi. Yoshlar tadbirkorligini rivojlantirish davlat maqsadli jamg‘armasi 2 turdagi qarz ajratishini e’lon qildi.

Birinchisi, tadbirkorlik uchun bino va inshootlarni qurish, ta’mirlash va jihozlash uchun 6 ming BHM miqdorida bo‘lib-bo‘lib to‘lash sharti bilan 3 yilgacha muddatga ajratiladigan qarz.

Ikkinchi turdagi qarz esa olis va chekka mahallalarda xorijiy tillarni o‘rgatish bo‘yicha o‘quv markazlarini tashkil qiladigan tadbirkorlarga beriladi. Mablag‘ning miqdori esa 320 BHM miqdorida bo‘ladi.

Jamg‘arma berayotgan imtiyozli qarzlar yoshlarga o‘z biznesini boshlash va rivojlantirishga xizmat qilishi lozim.

Nukusdagi dala o‘quv maydonida yuz bergan portlashda 10 ga yaqin harbiy xizmatchi jarohatlandi

10 sentabr kuni Nukus dala o‘quv maydonida amaliy o‘quv mashg‘uloti tashkillashtirilgan. Milliy gvardiyaning ma’lumot berishicha, mashg‘ulot davomida o‘quv mashg‘uloti uchun mo‘ljallangan portlovchi maxsus vositaning detonatsiya shnuri chaqnashi natijasida kichik portlash yuzaga kelib, mashg‘ulot ishtirokchilaridan 10 ga yaqin harbiy xizmatchi turli darajadagi tan jarohati olgan.

Ta’kidlanishicha, ularga o‘z vaqtida birinchi tibbiy yordam ko‘rsatilgan va hozir harbiy xizmatchilarning sog‘ligi tiklanmoqda.