Navoiyda mast holda 23 nafar bolani tashigan DAMAS haydovchisi ushlandi

Uning haydovchilik guvohnomasi ham, avtomobilni boshqarish huquqi ham yo‘qligi aniqlandi.

Foto: Videodan kadr

Navoiy viloyatida Damas haydovchisi 23 nafar bog‘cha bolasini mast holatda tashib ketayotgani aniqlandi. Bu haqda viloyat IIB YHXB xabar berdi.

Hodisa 15 sentabr kuni Navoiy viloyatining Navbahor tumanida sodir bo‘lgan. Nazorat tadbirlari davomida to‘xtatilgan Damas avtomashinasi salonida 23 nafar bola va 2 nafar tarbiyachi borligi aniqlangan.

Fuqaro maxsus uskuna yordamida ko‘rikdan o‘tkazilgach, mast holatda ekani ma’lum bo‘lgan. Shuningdek, uning haydovchilik guvohnomasi ham, avtomobilni boshqarish huquqi ham yo‘qligi aniqlangan.

«Bir kun oldin charchagan edim, shuning uchun pivo ichgan edim», dedi haydovchi.

Unga nisbatan tegishli tartibda chora ko‘rilgan holda transport vositasi vaqtincha saqlash uchun jarima maydoniga joylashtirilgan.