Rossiya qamog‘i va urushdan omon qolishning noodatiy yo‘li – o‘zbek “narkobaroni” iqrori

Ayni paytda Rossiyada jazo muddatini o‘tayotgan o‘zbekistonlik mahbus avval Surxondaryoda to‘rt kishidan iborat, giyohvand vositalari noqonuniy savdosi bilan shug‘ullangan jinoiy to‘daga boshchilik qilganini aytmoqda. Uning aytishicha, Uzun tumanida bir necha joyga giyohvand moddalarini yashirgan. U jazoni O‘zbekistonda o‘tash imkoniyati bo‘lsa, qilmishlarini tan olishga va sheriklarini fosh qilishga tayyorligini bildirdi.

{Yii::t(}

O'tkazib yuborish 6s

O'tkazib yuborish

U o‘zining O‘zbekistonda narkobaron bo‘lgani, giyohvand moddalar noqonuniy savdosi bilan shug‘ullanuvchi jinoiy guruhga boshchilik qilganini aytmoqda.

Ukrainada urushga majburlanayotgan mahbuslar haqida turli xabarlar avval ham tarqalgan edi. Ammo bu safar o‘zbekistonlik mahbusning shaxsiy guvohligi vaziyat ancha jiddiy ekanini ko‘rsatmoqda.

Mahbusning aytishicha, u turgan qamoqxonada mahbuslar muttasil urushga da’vat qilib kelinadi. U qamoqxonaga kelayotgan harbiylar “Urushga borishlaring uchun sizlar bilan shartnoma tuziladi, 1 million rublgacha haq to‘lanadi. Ko‘pi bilan 10–15 kun ichida kartangizga mablag‘ o‘tkaziladi. Bir yil ichida xizmatdan qaytsangiz, ozod etilasiz va qilgan jinoyatlaringiz ham kechiriladi”, deganini aytmoqda.

Aytishicha, hozircha urushga ketishga rozi bo‘lmagan mahbuslar kelgusida majburiy tarzda jo‘natilishi mumkinligi haqida ham ogohlantirilgan.

“Bu yerda berilayotgan ovqatni it ham yemaydi. Inson qadri, huquqi haqida gap ham bo‘lishi mumkin emas. Sovuqda ishlaymiz, kiyim berilmaydi. Itdek ishlab olayotgan oyligimiz sovun yoki paypoq sotib olishga ham yetmaydi”, - deydi mahbus.

U suhbat davomida o‘zining narkobaron ekani, jinoiy guruhni boshqarganini aytmoqda.

“Surxondaryoning Uzun tumani qishloqlaridagi ikkita joyga 3 kilogrammdan afg‘on geroinini yashirganman. U joyni faqat o‘zim bilaman va O‘zbekiston qamoqxonasiga ekstraditsiya qilinsam, ochiqlamoqchiman.

Qo‘l ostimda to‘rt kishi bo‘lgan, barcha ishlar mening topshirig‘im bilan bajarilgan. Ularning ham har birida yana o‘nlab odamlar bo‘lgan. Ular kerakli joyga, odamlarga mahsulotni mening buyrug‘im bilan yetkazib bergan. O‘zbekistonning boshqa viloyatlarida, Afg‘onistonda sheriklarim ko‘p edi. Ular hozir ham bu ish bilan shug‘ullanayotganidan xabarim bor. Barchasi haqida aytib beraman”, dedi u.

Mahbus O‘zbekiston huquq-tartibot idoralari orqali vatanga qaytishni so‘ramoqda. U qilgan jinoyatlarini tan olib, “qancha muddat bo‘lsa-da O‘zbekistonda qamalishni, o‘sha yerda jazomni olishni istayman. Bu yerda meni ertami-kechmi urushga jo‘natib yuborishadi”, dedi.

Suhbatdoshimizning shaxsiy ma’lumotlari uning xavfsizligi vajidan oshkor etilmadi. Agar Ichki ishlar vazirligi yoki boshqa tegishli idoralar uchun bu qiziq bo‘lsa, Kun.uz barcha ma’lumotlarni taqdim etishga tayyorligini bildiradi.