Shavkat Mirziyoyev Namangan viloyatini ijtimoiy-iqtisodiy rivojlantirish yuzasidan yig‘ilish o‘tkazdi

Prezident Shavkat Mirziyoyev raisligida 16 sentabr kuni Namangan viloyatini ijtimoiy-iqtisodiy rivojlantirish yuzasidan yig‘ilish bo‘lib o‘tdi.

«Har safar bu viloyatga kelganimda, odamlardagi ko‘tarinki kayfiyatni, kattayu-kichik doimo harakatda, izlanishda yurganini ko‘rib quvonaman. Bugun ham hududdagi ijobiy o‘zgarishlar, yangi ishga tushgan korxonalar bilan tanishib, islohotlarimiz to‘g‘ri yo‘ldan borayotganiga yana bir bor amin bo‘ldim», dedi davlat rahbari yig‘ilish avvalida.

Qayd qilinishicha, qisqa vaqt ichida Namanganda kambag‘allik 2,5 barobar kamaydi. Bu, eng avvalo, yaratilgan sharoit va viloyat aholisining mashaqqatli mehnati bilan bo‘lgani ta’kidlandi.

So‘nggi sakkiz yilda viloyatga 7 milliard dollar xorijiy investitsiya kirdi, 8 mingga yaqin yangi korxona ishga tushdi. Eksport qilinayotgan mahsulotlar turi 2 karra ko‘payib, 1 mingdan oshdi. Aholining real o‘rtacha daromadi 3 barobar oshdi. Mehnatga layoqatli aholining 82 foizi aynan kichik biznes va tadbirkorlik orqali daromad topmoqda.

Ta’kidlanishicha, ijtimoiy infratuzilmani yaxshilash uchun Kosonsoy va Norin tumanlariga 100 milliard so‘mdan, qolgan tumanlarning ikkitadan «og‘ir» mahallasiga esa 5 milliard so‘mdan, jami 320 milliard so‘m berilib, ular namunali hududga aylantiriladi.

Kosonsoy, Namangan, To‘raqo‘rg‘on, Uychi va Yangiqo‘rg‘onda tunu-kun ishlaydigan 8 ta servis ko‘chasi barpo etish reja qilingan.

Viloyat Islohotlar shtabiga tadbirkorlar bilan har bir tumanda kamida 2 tadan so‘lim tabiatli joylarni tanlab, ular bo‘yicha master-reja ishlab chiqish, amalga oshiriladigan loyihalar hisobiga keyingi yilda 50 ming odamni ishli va daromadli qilish topshirildi.

Shuningdek, Pop, To‘raqo‘rg‘on, Uychi, Uchqo‘rg‘on va Chustdan o‘tgan daryo va soy o‘zanlarining 40 kilometr qismida ham 650 ta servis obektini qurib, 10 ming odamni daromadli qilish mumkinligi ko‘rsatib o‘tildi. Mutasaddilarga bu yerlarning muhofaza zonasi va konturini belgilab, auksionga chiqarishni boshlash topshirildi.

Prezident To‘raqo‘rg‘onda tomchilab sug‘orish orqali 5 ming gektar adir yerlarni o‘zlashtirish ishlari boshlanganini ma’qulladi. Hozirgacha 2 ming gektar o‘zlashtirildi, shundan 1,3 ming gektarida bog‘ va uzumzor tashkil etildi, 4 ming kishi ishli bo‘ldi. Bu ishlarni davom ettirib, Pop tumanida 4 ming gektar, Kosonsoy, Chust va Mingbuloq tumanlarida 1 ming gektardan yerni qayta foydalanishga kiritish vazifasi qo‘yildi.

Uchqo‘rg‘on va Norin tumanidagi 1 ming xonadonda forel balig‘i yetishtirishni yo‘lga qo‘yish, 1 sotixli 350 ta sun’iy hovuz o‘rnatib, aholiga bo‘lib berish muhimligi ta’kidlandi.

Namanganlik tekstilchilar brend bilan ishlash bo‘yicha respublikada yetakchi ekani ta’kidlandi. Investitsiya olib kelish va brendlar bilan hamkorlikni kengaytirish uchun bir oyda viloyatda alohida loyiha ofisi ochiladi. Xalqaro sertifikat olgan tekstil korxonalari 50 taga yetkaziladi.

Yil boshidan viloyatga 1 million 200 ming xorijiy, 2 million mahalliy sayyoh keldi, turizm eksporti 200 million dollardan oshdi. Bunda har yili an’anaviy ravishda o‘tkazib kelinayotgan Xalqaro gullar festivalining o‘rni katta ekani ta’kidlandi. Chortoqni butun yil davomida xizmat ko‘rsatadigan vodiyning turizm xabiga aylantirish topshirildi. Chortoqdagi loyihalar infratuzilmasi uchun 50 million dollar ajratilishi aytildi.

Jahon banki bilan O‘rta shaharlarni rivojlantirish loyihasi doirasida joriy yilda «Furqat» bog‘i rekonstruksiya qilinib, hududi qariyb 2 barobar kengaytiriladi, Chortoqsoy bo‘ylab 11 kilometr uzunlikda piyodalar va velosiped eko-yo‘laklari quriladi.

Jadal kompleks rivojlantirish dasturi doirasida Chortoqsoy va Katta Namangan kanali qirg‘oqlarining 7 kilometri betonlashtirilib, 30 gektar yer foydali maydonga aylantiriladi.

Bu yerdagi ko‘p yillik bog‘lar bilan uyg‘un holda sanatoriy tipidagi yirik servis obektlari barpo etiladi. «Chortoq» suv ombori atrofida turizm kompleksi, mehmonxona, restoran, dam olish va ko‘ngilochar maskanlar tashkil qilinadi.

Yana bir yirik loyiha – Pop tumanidagi Arashan ko‘li atrofida 1 ming 200 gektar maydonda yiliga 1 million sayyohni qabul qiladigan yirik turizm kompleksi barpo etiladi.

Turizm sohasidagi katta loyihalar uchun kadrlar tayyorlash maqsadida keyingi o‘quv yilidan Avstriyaning Krems universiteti bilan Namangan davlat universitetida qo‘shma fakultet tashkil qilinadi.

Viloyat aholisi talabini inobatga olib, Qoradaryo ustidagi 63 yil oldin qurilgan Namangan va Andijon viloyatlarini bog‘lovchi 180 metrli eski ko‘prikni rekonstruksiya qilish boshlandi. Buning natijasida transport qatnovi 2 barobar oshadi, yo‘lga ketadigan vaqt 1,5 karra qisqaradi, tirbandlik keskin kamayadi. Mutasaddilarga 694 kilometr yo‘l va mahallalardagi 7 ta kichik ko‘prikni ta’mirlashni joriy yilda yakunlash topshirildi.

Viloyat markazini poytaxt bilan bog‘laydigan, kuniga 15 ming transport harakatlanadigan «Pungon-Namangan» yo‘lining 75 kilometri rekonstruksiya qilinadi. Bu yo‘l 246 million dollar hisobiga 4 tasmali, beton qoplamali qilib quriladi, 34 ta ko‘prik, 22 ta piyodalar o‘tish joylari barpo etiladi.

Bu yil viloyatda suv tizimini yaxshilashga 800 milliard so‘m ajratildi. Mutasaddilarga yil yakunigacha 130 kilometr suv va kanalizatsiya tarmog‘i, 11 ta suv inshooti qurilishini yakunlab, foydalanishga topshirish vazifa qilib qo‘yildi.

Namangan shahri aholisini ichimlik suvi bilan ta’minlovchi 70 yil oldin qurilgan «Kurashxona» suv inshooti Yevropa tiklanish va taraqqiyot banki bilan hamkorlikda rekonstruksiya qilinadi.

Chust, Pop, Mingbuloq va Namangan tumanlarida suv va kanalizatsiya tizimini yaxshilash bo‘yicha loyiha hujjatlarini yakunlash topshirildi.

Yaqinda Namangan aholisi bir millionli shaharga aylanadi. Bu sharoitda bog‘chalarni ko‘paytirish juda dolzarb ekani ta’kidlandi. Namangandagi 49 ta texnikumga xorijiy standartlarni olib kelib, ularning barchasida dual ta’limni yo‘lga qo‘yish topshirildi.

Ijtimoiy himoya milliy agentligiga endilikda demensiya va Parkinson kabi kasalliklar bilan xasta odamlar uchun ham qarab turish xizmatini yo‘lga qo‘yish topshirildi. Shuningdek, kunduzgi parvarish xizmatlariga qo‘shimcha ravishda nogironligi bor bolalarning funksionalligini oshirishga qaratilgan reabilitatsiya va pedagogik xizmatlarni joriy etish muhimligi qayd etildi.

«Navbahor» futbol maktabini uch yil muddatga Niderlandiyaning mashhur «Ayaks» futbol akademiyasi boshqaruviga berish bo‘yicha kelishuvga erishildi. Ushbu akademiyaning 11 nafar murabbiy, skaut va metodistlari Namanganga olib kelinadi.

Prezident kelajakda bu akademiyada dunyoning top-klublarida o‘ynaydigan, jahon chempionatlarida o‘z mahoratini namoyon qiladigan ko‘plab futbolchilar yetishib chiqishiga ishonch bildirdi.

Yig‘ilish davomida hudud va tarmoqlar rahbarlarining hisobotlari tinglandi, tadbirkorlarning namunali tajribalari ko‘rib chiqildi.