“Sharmanda bo‘ldim” – Toshkentda avtobusda qizlarga shilqimlik qilgan erkak 5 sutkaga qamaldi

54 yoshli erkak avtobusda shahvoniy shilqimlik qilib, yo‘lovchi qizlarning orqa qismiga qo‘l cho‘zgan. Uning bu harakatini boshqa bir yo‘lovchi tasvirga tushirgan.

Ijtimoiy tarmoqlarda Toshkent shahrida avtobusda erkakning qizlarga shahvoniy shilqimlik qilgani aks etgan videolavha tarqaldi. Poytaxt IIBB axborot xizmati ushbu harakatni amalga oshirgan erkak ushlanganini ma’lum qildi.

Kun.uz tanishgan sud qarorida keltirilishicha, holat 2025 yil 11 sentabr kuni sodir bo‘lgan. 1971 yilda tug‘ilgan F.S. “Xalqlar do‘stligi-Sirg‘ali” yo‘nalishida bo‘yicha harakatlanayotgan 11-sonli avtobusda yo‘lovchi sifatida ketayotgan qizlarning orqasiga qo‘llari bilan teginib, ularga nisbatan shahvoniy shilqimlik qilgan. 17 sentabr kuni holat yuzasidan Chilonzor tuman IIOFMB HPX profilaktika inspektori tomonidan ma’muriy huquqbuzarlik to‘g‘risida bayonnoma rasmiylashtirilgan.

Toshkent shahar IIBB axborot xizmati e’lon qilgan lavhada erkak bu ishi bilan sharmanda bo‘lganini aytgan.

“Drujba tomonda yonimga bir qiz chiqdi. O‘zimni ushlolmay, nafsimni tiyolmasdan orqa tomoniga qo‘lim ketib qoldi. Shunaqa ish qilib qo‘ydim. Sharmanda bo‘ldim. Uzr so‘rayman”, degan u.

Erkak qilgan qilmishidan pushaymon ekanini, boshqa bunaqa holat qaytarilmasligini bildirgan.

JIB Chilonzor tuman sudining 2025 yil 17 sentabrdagi qarori bilan F.S. Ma’muriy javobgarlik to‘g‘risidagi kodeksning 41−1-moddasi 1-qismida nazarda tutilgan (shahvoniy shilqimlik) huquqbuzarlikni sodir qilgan deb topildi. Unga 5 sutka ma’muriy qamoq jazosi tayinlandi.

Avvalroq Marg‘ilon shahrida 17 yoshli qizga mahalla binosida shilqimlik qilgan 48 yoshli mahalla raisi 4 sutkaga qamalgandi.