Toshkentda yosh qizlarga uyatsiz harakatlar qilgan erkakka nisbatan jinoyat ishi qo‘zg‘atildi

Bolalar ombudsmanining xabar qilishicha, uning shaxsiy qabuliga Toshkent shahrida istiqomat qiluvchi fuqaro murojaat bilan kelgan. U murojaatida joriy yilning 13 may kuni Uchtepa tumani hududida joylashgan bolalar maydonchasida notanish erkak 2012 yilda tug‘ilgan qiz O.Y va uning dugonasi L.A.ga nisbatan shahvoniy shilqimlik, ya’ni voyaga yetmagan qizlarga uyatsiz-buzuq harakatlar qilganligini, lekin tergov organi holatga bola manfaati nuqtai nazaridan yondashmaganligini bayon qilgan.

Mazkur holat yuzasidan Bolalar ombudsmani tomonidan tergov va sudning tegishli hujjatlari o‘rganilganda, tergovga qadar tekshiruv vaqtida ish holatlari to‘la va xolis o‘rganilmasdan, vaziyatga to‘liq huquqiy baho berilmagan tarzda ish bir tomonlama ko‘rilib, yakunlanganligi haqida xulosaga kelingan.

Shundan so‘ng, mazkur ishni to‘la va xolisona tekshirish uchun Toshkent shahar sudining jinoyat ishlari bo‘yicha apellyatsiya sudlov hay’atiga iltimosnoma kiritilib, 16 yoshdan kichik bolalarga nisbatan shahvoniy shilqimlik harakatlarida jinoyat alomatlari borligi tufayli mazkur sud qarorini bekor qilgan holda jinoyat ishi qo‘zg‘atish uchun tegishli tuman prokuraturasiga yuborilishi so‘ralgan.

Qayd etilishicha, 17 sentabr kuni Toshkent shahar sudida apellyatsiya tartibida ish ko‘rib chiqildi va ishni qo‘shimcha tergovga qadar tekshiruvga qaytarish va prokuratura tomonidan ayblanuvchiga nisbatan jinoyat ishi qo‘zg‘atish masalasini hal etish to‘g‘risida sud qarori chiqarildi.