Iste’mol qilish muddati tugayotgan oziq-ovqat mahsulotlari uchun chegirmalar joriy qilinadi

O‘zbekistonda iste’mol qilish muddati tugayotgan oziq-ovqat mahsulotlari uchun chegirmalar joriy qilinadi. Bu haqda "Oqilona iste’mol" (Save food) dasturini amalga oshirish bo‘yicha chora-tadbirlar rejasida belgilangan.

Unga ko‘ra, doimiy ravishda yirik savdo markazlari va oziq-ovqat do‘konlarida iste’mol qilish muddati tugash arafasida bo‘lgan mahsulotlar rastalari tashkil etiladi.

Iste’mol qilish muddati tugash arafasida bo‘lgan mahsulotlar narxi har 10 kunda pasaytirib boriladi.

Shuningdek, daladan savdo rastalarigacha yetkazib berish tizimining har bir bosqichida oziq-ovqat mahsulotlari yo‘qotishlarining oldini olish choralari ko‘riladi. Bunda yetishtirilgan oziq-ovqat mahsulotlarini yig‘ishtirib olish, saralash, yuklash, tashish, muzlatkichlarga joylashtirish jarayonlari monitoring qilinadi.