Misr kompaniyasi O‘zbekistonda qayta tiklanuvchi energiya manbalari bo‘yicha loyihani amalga oshirishi mumkin

Uchrashuvda ikki mamlakat o‘rtasida ekologik toza texnologiyalarni joriy etish va "yashil" iqtisodiyotni rivojlantirish borasidagi istiqbolli tashabbuslar muhokama qilindi.

Kompaniya rahbari Tamer Ismail O‘zbekiston bilan yaqin hamkorlikka tayyor ekanligini ta’kidladi.

"O‘zbekistonning barqaror rivojlanish strategiyasi, qayta tiklanadigan energiya manbalarini kengaytirishga qaratilgan islohotlar va ekologiya sohasidagi davlat dasturlari "GY ECO Energy" uchun imkoniyat maydoni hisoblanadi", dedi u.

Muloqot davomida ikki mamlakat mutaxassislari o‘rtasida amaliy hamkorlikni yo‘lga qo‘yish, qo‘shma loyihalarni muhokama qilish bo‘yicha muzokaralarni davom ettirish va aniq tashabbuslarni belgilash to‘g‘risida kelishib olindi.

"GY ECO Energy" kompaniyasi faoliyati maishiy chiqindilarni energiyaga aylantirish, muqobil yoqilg‘i ishlab chiqarish, "yashil" vodorod va organik o‘g‘itlar tayyorlash, tibbiy, sanoat va elektron chiqindilarni utilizatsiya qilish, quyosh energetikasini rivojlantirish hamda plastik va rezinani qayta ishlash kabi innovatsion yo‘nalishlarni o‘z ichiga oladi.