Toshkent shahar FVB telefonni quvvatlagichda nazoratsiz qoldirmaslik to‘g‘risida ogohlantirdi 

Toshkent shahar Favqulodda vaziyatlar boshqarmasi telefonni quvvatlagichda nazoratsiz qoldirish turli xavfli oqibatlarga olib kelishi haqida ogohlantirdi.

Ta’kidlanishicha, telefon yoki quvvatlagich haddan tashqari qizib ketishi mumkin, elektr toki uzilishlari yoki kuchlanishning o‘zgarishi portlash yoki yong‘inga sabab bo‘lishi ehtimoli bor.

Shuningdek, past sifatli yoki buzilgan quvvatlagich ishlatilsa, simlar erib ketishi yoki qisqa tutashuvi yoki elektr toki urishi sodir bo‘lishi, haddan tashqari quvvatlanish natijasida batareya shishib ketishi va ishlashdan chiqishi mumkin.

Boshqarma xavfsizlik choralari bo‘yicha quyidagi tavsiyalarni bergan:

Telefonni kechasi quvvatga qo‘yib uxlamaslik, telefon ortiqcha qizib ketgan bo‘lsa, quvvatdan uzib, sovishini kutish hamda zarur bo‘lmasa, doimiy ravishda 100 foiz quvvatda saqlamaslik (40-80 foiz oralig‘ida ushlab turish).