Qurilish korxonalari shartnomani bekor qilgan mijozlardan noqonuniy jarima undirayotgani aniqlandi

Ayrim qurilish korxonalari mijozlar bilan imzolangan shartnomalarga qonunchilikka zid bandlar kiritayotgani aniqlandi, deb xabar berdi Raqobat qo‘mitasi.

Qayd qilinishicha, shu yilning yanvar–avgust oylarida ko‘p qavatli uy-joylar qurilishi va xaridlari bo‘yicha mingga yaqin murojaat kelib tushgan. Ularda asosan qurilish tashkilotlari bilan tuzilgan shartnoma shartlarining buzilishi — yangi uy-joylarni o‘z vaqtida topshirmaslik, shartnomada belgilangan talablarni bajarmaslik, reklama va e’lonlarda ko‘rsatilgan loyihalarga amal qilmaslik kabi holatlar bayon etilgan.

Shuningdek, ayrim qurilish korxonalari shartnomalarga qonunchilikka zid bandlar kiritayotgani ham aniqlangan. Xususan, shartnoma shartlarida «agar iste’molchi o‘z tashabbusi bilan shartnomani bekor qilsa, qurilish tashkiloti iste’molchi tomonidan to‘langan mablag‘ning yoki shartnoma qiymatining 10 foizi miqdoridagi summani jarima sifatida ushlab qolish huquqiga ega» deb belgilangan.

Raqobat qo‘mitasi bunday talab qonun me’yorlariga zid ekanini ma’lum qildi.

Jumladan, Fuqarolik kodeksining 385-moddasida shartnoma bekor qilinganda faqat ikkinchi tarafga aniq zarar yetkazilgan taqdirdagina uni qoplash mumkinligi belgilangan. Mijoz shartnomani bekor qilganda esa qurilish tashkilotiga zarar yetkazilmaydi.

Raqobat qo‘mitasi xonadon xarid qilishda shartnomaning barcha shartlari bilan atroflicha tanishib chiqishni tavsiya qildi. Shuningdek, agar shartnomada qonunchilik me’yorlariga zid bo‘lgan talab yoki iste’molchi huquqlarini cheklovchi band aniqlansa, sud organlariga yoki vakolatli davlat idoralariga murojaat qilish mumkin.