“Qambarota GES-1” loyihasini moliyalashtirish bo‘yicha anglashuv memorandumlari imzolandi

9-10 oktyabr kunlari Belgiyaning Bryussel shahrida bo‘lib o‘tgan “Global Gateway” forumi doirasida O‘zbekiston, Qozog‘iston va Qirg‘iziston Energetika vazirliklari hamda Yevropa tiklanish va taraqqiyot banki (YeTTB) va Yevropa investitsiya banki (YeIB) o‘rtasida “Qambarota GES-1” loyihasini moliyalashtirish bo‘yicha anglashuv memorandumlari imzolandi.

Unda Xalqaro hamkorlik bo‘yicha Yevropa komissari Yozef Sikela, YeTTB prezidenti Odil Reno-Basso, YeIB va Italiyaning “Cassa Depositi e Prestiti” banklari rahbariyati ishtirok etdi.

Forum doirasida Germaniya xalqaro hamkorlik jamiyati (GIZ) tomonidan tashkil etilgan “Markaziy Osiyoda sheriklik muloqoti” bo‘lib o‘tdi. Unda O‘zbekiston, Qozog‘iston, Qirg‘iziston, Tojikiston va Turkmaniston Energetika vazirliklari ishtirok etdi.

Shu bilan birga, Yevropa Ittifoqi tomonidan xalqaro moliya institutlari va qo‘shni davlatlar Energetika vazirliklari ishtirokida “Markaziy Osiyoda gidroenergetika salohiyatini oshirish” sessiyasi tashkil etildi.

Ma’lumot uchun: “Qambarota GES-1” loyihasi doirasida 5,4 mlrd kub metrga teng suv ombori va 1860 MVt quvvatli gidroelektr stansiyasi ishga tushiriladi. Natijada yiliga o‘rtacha 5,6 mlrd kVt·soat elektr energiyasi ishlab chiqarish imkoniyati yaratiladi.