Samarqandda qimorga mukkasidan ketgan shaxs aka va ukasining qiynog‘idan so‘ng vafot etdi

Aka-uka onlayn qimorga mukkasidan ketgan o‘rtancha o‘g‘ilni bu yo‘ldan qaytarish maqsadida daraxtga bog‘lab qo‘yib, kaltaklashgan. Oqibatda og‘ir tan jarohati olgan 29 yoshli yigit vafot etgan. «Odamlardan, bankdan qarz olib, onlayn qimorga tikib yuborardi. Odamlar uyga qarzlarini so‘rab kelardi, akasi va ukasi to‘lardi», degan o‘g‘illarning otasi sudda.

{Yii::t(}

O'tkazib yuborish 6s

O'tkazib yuborish

Samarqand shahrida qimorga berilgan o‘rtancha o‘g‘ilning o‘limiga sabab bo‘lgan aka-uka jinoiy jazoga tortildi. Kun.uz sud hujjati bilan tanishdi.

Sud hukmida keltirilishicha, 30 yoshli U.A. va 23 yoshli Q.A. o‘rtancha o‘g‘il J.A.ni qimor o‘yinidan qaytarish maqsadida «tarbiyalab» qo‘ymoqchi bo‘lishgan. Ular 2025 yil 20 iyun kuni soat 15:00 larda yashash uylarida J.A.ni kaltaklab, arqon bilan hovlidagi daraxtga bog‘lab qo‘yishgan. So‘ngra U.A. g‘ayriqonuniy ravishda ozodlikdan mahrum qilingan J.A.ning tanasining turli qismlariga sim kabel bilan shafqatsizlarcha urib, unga qasddan jarohat yetkazgan. Oqibatda og‘ir tan jarohati olgan J.A. hodisa joyida vafot etgan.

U.A. sudda aybiga to‘liq iqrorlik billirgan va maqsadi ukasini qimordan qaytarish bo‘lganini aytgan.

«O‘rtancha ukam J.A. ayrim fuqarolardan qarz bo‘lib qolgandi. Topgan pulini onlayn qimorga tikib yuborardi. Uydagi ko‘p narsalarni, turmush o‘rtog‘i, hatto onamga tegishli bo‘lgan tilla taqinchoqlarni ham sotib, pullarini onlayn qimorga sarflab yubordi. 

2025 yil 20 iyun kuni tushlikka yaqin ukamning oldiga borib, to‘lashi lozim bo‘lgan krediti nima bo‘lganini so‘radim. U pullarni qimorga tikib, yutqazib qo‘ygani, ishlab to‘lashini aytdi. Uning gaplaridan jahlim chiqib, og‘zaki tarzda tortishib qoldim. So‘ngra uni bu yo‘ldan qaytarish maqsadida kichik ukam Q.A.ga qo‘ng‘iroq qilib, uni chaqirdim.

Shu kuni soat 15:00 lar atrofida J.A.ni urdik. So‘ngra arqon bilan hovli o‘rtasidagi daraxtga bog‘ladik. Shundan keyin taxminan 30 daqiqa tanasining duch kelgan joylariga sim kabel bilan urdim. Kichik ukam esa yonimda qarab turdi. J.A.ning yuzi, boshi va tanasi shilinib, qon oqa boshladi. Keyin uni arqondan bo‘shatib, yuvintirdik hamda tashqaridagi krovatga yotqizdik. J.A. issiq ekanini aytgach, uyga olib kirdik. So‘ngra u dam olishini aytib, uxladi. Ancha vaqt o‘tgach tobi qochdi, yuragi sekin ura boshladi. Tez tibbiy yoram chaqirdik. Yetib kelgan shifokorlar ukam vafot etganini aytishdi», degan U.A. suddagi ko‘rsatmasida.

Aka qilgan ishidan pushaymonligini aytib, bir ukasining o‘limiga, kichik ukasining qamalishiga sababchi bo‘lganidan vijdon azobida qiynalayotganini bildirgan.

Q.A. ham sudda akasinikiga o‘xshash ko‘rsatma bergan.

J.A.ning otasi I.T. ham sudda ko‘rsatma berib, o‘rtancha o‘g‘li qimorga berilgan bo‘lgani, odamlardan qarzi ko‘payib ketganini ma’lum qilgan.

«O‘rtancha o‘g‘limning ishi yaxshi edi, u payvandlash ishlari bilan shug‘ullanardi. 3-4 yildan buyon onlayn qimor o‘yinlariga berilib qoldi. Bu kabi o‘yinlarni o‘ynamasligi haqida bir necha marta tayinlab, tanbeh berganman. Ammo u gapimga kirmadi, ishlagan pulini onlayn qimor o‘yinlariga tikib yuboraverdi. Uyga biror marta pul olib kelmagan. Akasi va ukasi ham qimor o‘ynamasligi, oxiri baribir qarz bo‘lib qolishini aytishsa-da, ular bilan janjal qilardi. Qarzi ko‘payib ketdi, odamlar uyiga pulini so‘rab kelaverganidan so‘ng akasi va ukasi qarzlarini to‘lab berishni boshladi. Lekin u odamlardan ham, bankdan ham qarz olib, topgan pulining hammasini onlayn qimorga tikishdan qaytmadi», degan ota.

I.T. sudda kichik o‘g‘liga qamoq bilan bog‘liq bo‘lmagan jazo tayinlashni so‘ragan. 

Samarqand shahar sudi hukmi bilan U.A. va Q.A. Jinoyat kodeksining 138-moddasi (Zo‘rlik ishlatib g‘ayriqonuniy ravishda ozodlikdan mahrum qilish) 2-qismi «a» bandi va 104-moddasi (Qasddan badanga og‘ir shikast yetkazish) 3-qismi «d» bandida nazarda tutilgan jinoyatlarni sodir qilganlikda aybli deb topilgan. Akaga 8,5 yil, ukaga esa 6,5 yil muddatga ozodlikdan mahrum qilish jazosi tayinlangan.