Andijonda fuqaro ijtimoiy himoya agentligi xodimini jarohatladi

Andijonda mahalla fuqarolar yig‘ini binosida ijtimoiy xodimni fuqaro choynak bilan urdi. Bu haqda Ijtimoiy himoya milliy agentligi xabar berdi.

Xabarda aytilishicha, voqea 1 noyabr kuni sodir bo‘lgan. Mojaroga mahalla fuqarolari — Y.G va Y.D.ning elektr energiya uchun beriladigan bir martalik 1 mln so‘mlik kompensatsiya puli bank tomonidan qarz evaziga ushlab qolingani sabab bo‘lgan.

Janjal vaqtida fuqarolardan biri ijtimoiy xodimni qo‘lidagi choynak bilan urib, uning yuzi va qo‘liga tan jarohati yetkazgan.

Hozirda holat bo‘yicha tergovga qadar tekshiruv ishlari olib borilmoqda. Sud-tibbiyot ekspertizasi tayinlanib, yetkazilgan jarohat darajasi aniqlanmoqda.