Navoiyda 3 kishini yuk mashinasida qasddan bosib o‘ldirgan shaxs umrbod ozodlikdan mahrum qilindi

Navoiy viloyatining Tomdi tumanida dahshatli qotillik jinoyati sodir etildi. Bu ishga qo‘l urgan erkak sud hukmi bilan umrbod ozodlikdan mahrum qilindi. Kun.uz sud hujjati bilan tanishdi.

Sud hukmida keltirilishicha, 41 yoshli Salim Rustamov Tomdi tumanidagi fermer xo‘jaliklardan birida haydovchi bo‘lib ishlagan. U o‘ziga biriktirilgan HOWO yuk mashinasida chorva mollari uchun suv tashigan.

Salim Rustamov 2008 yilda Gulmira Ergasheva bilan turmush qurgan. Oila avvaliga Zarafshon shahrida, so‘ngra Tomdi tumanining Sharq ovulidagi dalahovlida yashab kelishgan. Ushbu dalahovli Gulmira Ergashevaga tegishli bo‘lgan.

2021 yil aprel oyida Salim Rustamov va Gulmira Ergasheva qonuniy tartibda ajrashgan. Fuqarolik ishlari bo‘yicha Zarafshon tumanlararo sudining 2024 yil 20 dekabrdagi qarori bilan Salim Rustamovni dalahovlidan majburiy tartibda chiqarish belgilangan. So‘ngra holat bo‘yicha MIB Zarafshon shahar bo‘limi tomonidan ijro ishi qo‘zg‘atilgan.

2025 yil 17 mart kuni MIB xodimlari majburiy chiqarishni amalga oshirish maqsadida dalahovliga borishgan. Voqea joyida Gulmira Ergasheva, uning otasi va onasi ham bo‘lgan. Shu vaqtda Salim Rustamov yuk mashinasini boshqarib kelib, avvaliga sobiq turmush o‘rtog‘ini, so‘ngra qaynonasi va qaynotasini qasddan bosib o‘tgan.

MIB xodimi suddagi holat bo‘yicha shunday ko‘rsatma bergan:

“Salim Rustamovning sobiq turmush o‘rtog‘i, sobiq qaynona va qaynotasi hovli darvozasi qulf bo‘lgani sababli tashqarida kutib turishgandi. Men ham yordamchi tashkilotlardan mas’ul hodimlar kelishini kutayotgandim. Birozdan so‘ng hovli yoniga Zarafshon shahar favqulodda vaziyatlar bo‘limi, tibbiyot birlashmasi, milliy gvardiya xodimlari yetib kelishdi.

Salim Rustamovga bir necha marotaba qo‘ng‘iroq qildim, ammo u javob bermadi. Uning o‘zi ishtirok etmagani sababli ikki xolis ishtirokida ijro harakatini keyinga qoldirish bo‘yicha dalolatnoma rasmiylashtirmoqchi bo‘ldim. Shu vaqtda shahar tomondan oq rangli katta yuk mashinasi harakatlanib kela boshladi.

Yuk mashinasida harakatlanib kelgan Salim Rustamov bizgacha taxminan 15-20 metr masofa qolganida to‘xtadi va biroz bizga qarab turdi. So‘ngra mashinani hovli darvozasi oldida turgan sobiq turmush o‘rtog‘i tomonga boshqarib borib, uni devorga tirab qo‘ydi. Keyin yo‘lak bo‘ylab kelayotgan sobiq qaynonasi tomonga rul boshqaruvini burib, uni mashina old tomoni bilan urib yubordi hamda ustidan bosib o‘tdi. Shu vaqtda men tan jarohati olmaslik uchun uzoqroq joyga qochib ketdim.

Salim Rustamov yuk mashinasini orqaga qaytarib burib olib, yerda hushsiz yotgan qaynonasi ustidan yana bir marotaba haydab o‘tdi. Shu vaqtda chetroqda turgan sobiq qaynotasi qo‘ltiq hassasida qizining oldiga bordi. Salim Rustamov uning ustiga ham mashinasini boshqarib bordi va ularni bosib ketdi. So‘ngra mashinasidan pichoq olib tushib, sobiq turmush o‘rtog‘ining yoniga bordi hamda unga ikki marta pichoq suqqanini ko‘rdim”.

Shundan so‘ng Salim Rustamov “yana qaysing shu ahvolga tushishni xohlaysanlar?”, deya MIB xodimlarini quvgan. So‘ngra qo‘lidagi pichoqni uloqtirib, mashinaga o‘tirib, voqea joyidan ketgan. Gulmira Ergasheva va uning ota-onasi og‘ir tan jarohatlari oqibatida vafot etgan.

JIB Tomdi tuman sudining 2025 yil 15 iyuldagi hukmi bilan Salim Rustamov Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi hamda 97-moddasi (qasddan odam o‘ldirish) 2-qismi “a,v,d,j” bandlarida nazarda tutilgan jinoyatlarni sodir qilganlikda aybli deb topilgan. Unga uzil-kesil umrbod ozodlikdan mahrum qilish jazosi tayinlangan. Jazoni maxsus tartibli koloniyalarda o‘tash belgilangan.

Jinoyat ishi Navoiy viloyat sudi jinoyat ishlari bo‘yicha sudlov hay’ati apellyatsiya instansiyasida ko‘rib chiqilgan.

Salim Rustamov apellyatsiya shikoyatida oilasi bilan hech qanday janjal yoki nizo kelib chiqmaganini, jinoyat sodir etganida aqli hushi o‘zida bo‘lmaganini aytib, suddan yengilroq jazo tayinlashni so‘ragan. Navoiy viloyat sudi jinoyat ishlari bo‘yicha sudlov hay’ati apellyatsiya instansiyasining 2025 yil 28 oktyabrdagi ajrimi bilan dastlabki sud hukmi o‘zgarishsiz qoldirilgan.