«O‘zbekneftgaz» to‘lagan soliqlar 16 foizga, «UzAuto Motors»niki qariyb 43 foizga qisqardi

Soliq qo‘mitasi 2025 yil yanvar-sentabr oylarida ishlab chiqarish sohasida eng ko‘p soliq to‘lagan Top-20 korxona ro‘yxatini e’lon qildi.

Qayd etilishicha, 2025 yilning 9 oyida 59 732 ta kompaniya tomonidan 67,9 trln so‘mdan ortiq soliq to‘langan. Shundan, 14,1 trln so‘mi 20 ta soliq to‘lovchi hisobiga to‘g‘ri keladi. Ularning tovar aylanmasi 168 trln so‘m, foydalangan soliq imtiyozlari miqdori esa 2 trln so‘mdan oshgan.

Soliq tushumlari miqdori bo‘yicha «O‘zbekneftgaz» yetakchilik qildi. Hisobot davrida kompaniya tomonidan 2,66 trln so‘mdan ko‘proq soliq to‘langan. Keyingi o‘rinlarni «UzBAT» (2,17 trln so‘m) va «UzAuto Motors» (1,36 trln so‘m) egallagan. Shuningdek, kuchli beshlikdan «Talimarjon IES» (1,29 trln so‘m) va «Tashkent Tabacco» (776,1 trln so‘m) MChJ o‘rin olgan.

O‘tgan yilning mos davri bilan taqqoslaganda, ishlab chiqarish sohasida faoliyat olib borayotgan tashkilotlar soni 64 ming 773 tadan 59 ming 732 taga yoki 7,8 foizga qisqargan. Shunday bo‘lsada, to‘langan soliq miqdori 33 trln 50,8 mlrd so‘mdan 67 trln 973,3 mlrd so‘mga yoki 2 barobarga oshgan.

2024 yilning yanvar-sentabr oylarida ham eng ko‘p soliq tushumlari «O‘zbekneftgaz» (3,18 trln so‘m), «UzAuto Motors» (2,38 trln so‘m) va «UzBAT» (2,12 trln so‘m) tomonidan amalga oshirilgandi.

Yirik korxonalarda soliq tushumlarining o‘zgarishi

2024 va 2025 yilning mos davri taqqoslanganda, qator yirik korxonalarda soliq tushumlari sezilarli darajada kamayganini ko‘rish mumkin. Xususan, yilning dastlabki 9 oyligida «O‘zbektnefgaz»da bu ko‘rsatkich 16,3 foizga, «UzAuto Motors»da 42,6 foizga, «Navoiyazot»da 24,3 foizga qisqardi. O‘z navbatida, «Talimarjon IES»ning soliq tushumlari qariyb 6 barobarga, «Coca-Cola Uzbekistan»niki 61,4 foizga, «International Beverages Tashkent»niki 52,6 foizga ko‘paygan.

O‘tgan yil Top-20 soliq to‘lovchilar tarkibiga kirgan «Farg‘ona NQZ» (2024 yilning 9 oyida 368 mlrd so‘m soliq to‘lagan), «Toshkentvino Kombinati» (288 mlrd so‘m), «Uz-Kor Gas Chemical» (240 mlrd so‘m) va «Artel» (188 mlrd so‘m) bu yilgi ro‘yxatdan o‘rin olmagan. Ushbu tashkilotlar hisobot davrida 199,4 mlrd so‘mdan kamroq soliq to‘lagan.