Chorbog‘ yo‘lida mototsikl haydovchisi YTHga uchrab, vafot etdi

Chorbog‘ yo‘lida inson o‘limi bilan bog‘liq YTH sodir bo‘ldi. Bu haqda Toshkent viloyati IIB YHXB matbuot xizmati xabar berdi.

Ma’lum qilinishicha, YTH 23 noyabr kuni soat taxminan 14:00 larda Bo‘stonliq tumani hududidan o‘tuvchi “Bektemir–Chorbog‘” avtomobil yo‘lining 64-km.da sodir bo‘lgan. 1982 yilda tug‘ilgan, Toshkent shahrida yashovchi G.A. o‘zining Honda mototsiklini “Chorbog‘–Toshkent” yo‘nalishida yuqori tezlikda boshqarib ketayotib, boshqaruvni yo‘qotgan. So‘ngra yo‘lning o‘ng tomonida o‘rnatilgan temir to‘siqqa borib urilgan.

Haydovchi olgan tan jarohatlari oqibatida voqea joyida vafot etgan. Holat yuzasidan Bo‘stonliq tumani IIB Tergov bo‘limi tomonidan Jinoyat kodeksining 266-moddasiga ko‘ra jinoyat ishi qo‘zg‘atilgan.

Avvalroq O‘zbekistonda 1 kunda 10 kishi YTH qurboni bo‘lgani xabar qilingandi. 1-21 noyabr kunlari respublika bo‘yicha YTHlardan eng ko‘p o‘lim holati Toshkent viloyatida qayd etilgan – 23 kishi.