O‘zbekiston oktyabrda oltinning eng yirik xaridorlaridan biri bo‘ldi

Markaziy banklar oktabr oyida sof oltin xaridini 53 tonnagacha oshirdi, deya xabar bermoqda Jahon oltin kengashi.

Bu sentabr oyiga nisbatan 36 foizga ko‘p va yil boshidan beri qayd etilgan eng yuqori oylik ko‘rsatkich hisoblanadi.

Eng yirik xaridorlar — Polsha va Braziliya Markaziy banki bo‘lib, ularning har biri 16 tonnadan oltin sotib olgan. Uchlikka O‘zbekiston Markaziy banki (9 tonna) ham kirgan.

Shuningdek, Indoneziya (4 tonna), Turkiya (3 tonna), Chexiya va Qirg‘iziston (2 tonnadan), Gana, Xitoy, Qozog‘iston va Filippin markaziy banklari (1 tonnadan) ham qimmatbaho metall xaridini amalga oshirishgan.

Hisobot davrida Rossiya regulyatori (3 tonna) oltin sotgan yagona markaziy bank bo‘lgan.

Yil boshidan noyabr oyigacha jahon markaziy banklari 254 tonna sof oltin xaridini amalga oshirgan. Bu avvalgi uch yilga nisbatan kamroq ko‘rsatkich bo‘lib, qisqarish joriy yilda narxlarning qimmatligi bilan izohlangan.

Yil boshidan beri eng yirik xaridorlar Polsha va Qozog‘iston, eng yirik oltin sotuvchilari esa Singapur va O‘zbekiston markaziy banklari bo‘lib qolyapti.