Xiaomi uch buklanadigan smartfonini qachon chiqarishi ma’lum qilindi

Huawei va Samsung ortidan Xiaomi korporatsiyasi ham uch buklanadigan smartfonini taqdim etadi. Bu haqda XiaomiTime blogida ma’lum qilindi.

Blogda aytilishicha, GSMA ma’lumotlar bazasida 2608BPX34C kodi ostidagi Xiaomi qurilmasi paydo bo‘lgan. Insayderlarning so‘zlariga ko‘ra, ushbu raqam ostida uch buklanadigan smartfon yashiringan.

U GSMA bazasida 2 dekabrda — Samsung o‘zining uch buklanadigan Galaxy Z TriFold smartfonini taqdim etgan kuni paydo bo‘lgan.

Qurilma MIX Trifold nomini olishi mumkin.

Smartfon mustahkam korpusga ega bo‘lishi va Snapdragon 8 Elite protsessorida ishlashi aytilmoqda.

Qayd etilishicha, Xiaomi MIX Trifold 2026 yilning uchinchi choragida sotuvga chiqadi.