Xalq bankida korrupsiyaga qarshi kurashishga bag‘ishlangan “Ochiq eshiklar kuni” o‘tkazildi

Tadbir boshida Xalq banki rahbariyati tomonidan korrupsiyaga qarshi kurashish borasida bank tizimida amalga oshirilayotgan ishlar haqida ma’lumot berildi. Boshqaruv raisi o‘rinbosari Xasanjon Axmedov bankda korrupsiya xavfini kamaytirish, ichki nazorat tizimini kuchaytirish va xodimlar o‘rtasida mas’uliyatni oshirishga qaratilgan chora-tadbirlar haqida so‘z yuritdi.

Shundan so‘ng Ichki nazorat va komplayens departamenti direktori Azamat Xaitov departamentning kunlik ish jarayonlari, monitoring tizimi va risklarni aniqlash mexanizmlari yuzasidan batafsil ma’ruza qildi. Tadbir davomida Huquqni muhofaza qilish akademiyasi prokurori Temur Safarov korrupsiyaga qarshi kurashish bo‘yicha amaldagi qonunchilik hujjatlarining mazmuni va ularning amaliy tatbiqi yuzasidan tushuntirish berdi. Unda korrupsiyaning huquqiy oqibatlari va davlat idoralaridagi yangilangan monitoring tizimlari haqida to‘liq aytib o‘tildi.

Ochiq eshiklar kunida taqdim etilgan ma’lumotlarga ko‘ra, 2025 yilning 11 oyi davomida Xalq bankining ichki nazorat bo‘limlari tomonidan 697 nafar yangi ishga qabul qilinayotgan yoki lavozimi o‘zgartirilayotgan xodimlar bo‘yicha tekshiruvlar o‘tkazilgan va tegishli xulosalar berilgan. 7 172 nafar xodimdan manfaatlar to‘qnashuvi bo‘yicha yillik deklaratsiyalar qabul qilingan va aniqlangan holatlar bo‘yicha choralar ko‘rilgan. Shuningdek, yil davomida bankning xarid jarayonlari bo‘yicha 310 ta kontragent yuzasidan ichki o‘rganishlar, shuningdek 65 ta ichki me’yoriy hujjat va 55 ta yangi bank mahsulotlari loyihalari bo‘yicha xulosalar taqdim etilgan.

Bank xodimlarining malakasini oshirish maqsadida 2024–2025 yillarda muntazam treninglar tashkil etilgan bo‘lib, joriy yilda 533 nafar xodim, shu jumladan 102 nafar komplayens mutaxassisi maxsus kurslarda o‘qitilgani qayd etildi.

Xalq bankining korrupsiyaga qarshi menejment tizimi ISO 37001:2016 xalqaro sertifikatiga ega bo‘lgani ham ta’kidlandi. 2024 yilda o‘tkazilgan tashqi audit natijasida mazkur sertifikat muvaffaqiyatli himoya qilingan.

Shuningdek, davlat idoralari faoliyati samaradorligi bo‘yicha 2024 yil yakunlari ham e’lon qilinib, natijalarga ko‘ra Xalq banki 85 ball to‘plab “yaxshi” toifaga kiritilgan.

Tadbir yakunida esa ishtirokchilar uchun savol-javoblar tashkil etildi. So‘ngra shaffoflikni ta’minlash, ichki nazoratni kuchaytirish va korrupsiyaga qarshi kurashishga doir qo‘shimcha takliflar ham muhokama qilindi.

Reklama huquqi asosida