FIFA O‘zbekiston milliy jamoasiga kamida 10,5 mln dollar to‘laydi

FIFA Kengashi 2026 yilgi jahon chempionatiga 727 million dollar miqdorida rekord darajadagi moliyaviy hissa qo‘shishni ma’qulladi, bu Qatardagi jahon chempionatidan 50 foizga ko‘p. Mablag‘lar ishtirokchilar o‘rtasida taqsimlanadi, deb xabar berdi ingliz jurnalisti Ben Jyeykobs.

Qayd qilinishicha, ishtirokchi milliy jamoalar tayyorgarlik jarayoni uchun 1,5 mln dollar, shuningdek, 33-48-o‘rinlarni egallagan jamoalar 9 mln dollar oladi. Bu har bir milliy jamoa, jumladan O‘zbekiston ham kamida 10,5 mln dollar olishini anglatadi.

Natijalar yaxshilangan sari to‘lovlar ham oshadi.

Jumladan:

- 17-32-o‘rinlar $11 mln;

- 9-16-o‘rinlar $15 mln;

- 5-8-o‘rinlar $19 mln;

- 4-o‘rin $27 mln;

- 3-o‘rin $29 mln;

- 2-o‘rin $33 mln;

- Chempion $50 mln.

JCh-2026 AQSh, Meksika va Kanada maydonlarida 11 iyundan 19 iyulga qadar o‘tkaziladi. O‘zbekiston milliy jamoasi guruh bosqichida 17 iyun kuni Kolumbiya bilan, 23 iyun kuni Portugaliya bilan, 27 iyun kuni saralashdan o‘tgan jamoa (Kongo DR/Yamayka/Yangi Kaledoniya) bilan o‘ynaydi.