Tramp Grenlandiyaning har bir fuqarosiga AQShga qo‘shilishi uchun 100 ming dollargacha to‘lamoqchi

Donald Tramp ma’muriyati tomonidan ishlab chiqilayotgan Grenlandiyani sotib olish rejasi «grenlandiyaliklarni sotib olish» variantiga aylanadi. Amerika rasmiylari orol aholisini Daniyadan ajralib chiqishga va ehtimol Qo‘shma Shtatlarga qo‘shilishga ko‘ndirish uchun ularga bir martalik nafaqa to‘lash imkoniyatini muhokama qildi, deb yozdi Reuters vaziyatdan xabardor to‘rt kishiga tayanib.

To‘lovlarning aniq miqdori va mexanizmi hali aniqlanmagan bo‘lsa-da, rasmiylar, jumladan, Oq uy xodimlari har bir kishi uchun 10 ming dollardan 100 ming dollargacha bo‘lgan miqdorni muhokama qildi, dedi agentlikning ikki manbasi.

Grenlandiya aholisiga to‘lovlar g‘oyasi 57 ming kishilik orolni «sotib olish» variantlaridan biridir. 5 yanvar kuni davlat kotibi Marko Rubio kongress yetakchilariga Tramp Grenlandiyani sotib olish niyatida ekani, jangovar ritorikadan esa Daniyaga bosim o‘tkazish va uni muzokaralarga undash uchun foydalanayotganini aytdi.

Oq uyda Grenlandiyani qo‘shib olishning bir nechta variantlari muhokama qilinmoqda. Oq uy matbuot kotibi Kerolin Levitt kuch ishlatish variantini istisno qilmadi.

«Prezident va uning jamoasi ushbu muhim tashqi siyosiy maqsadga erishishning bir qator variantlarini muhokama qilmoqda va albatta, AQSh Qurolli kuchlaridan foydalanish har doim bosh qo‘mondon ixtiyorida qoladi», dedi u.

Orol aholisiga bevosita to‘lovlar varianti Trampning «bitimlarga» bo‘lgan muhabbatiga qaramay, Daniyaga iqtisodiy qaramligini uzoq vaqtdan beri muhokama qilib kelayotgan va to‘liq mustaqillikka erishishni istagan Grenlandiya aholisi uchun haddan tashqari tranzaksion va hatto kamsituvchi bo‘lib tuyulishi mumkin, deb ta’kidlaydi Reuters. 2025 yilda o‘tkazilgan so‘rovda grenlandiyaliklarning 56 foizi mustaqillik uchun ovoz berishga tayyorligini, 28 foizi qarshi ovoz berishga tayyorligini bildirgan. Xuddi shu so‘rovda 85 foizi Grenlandiyaning AQSh tarkibiga kirishiga qarshi chiqdi.

Reuters agentligining orolni sotib olish, jumladan, uning aholisiga bevosita to‘lovlar imkoniyati haqidagi munozaralarga izoh berish so‘roviga javoban Oq uy Levitt va Rubioning bayonotlariga ishora qildi.