“Yer go‘zali 2025” tanlovida qatnashgan o‘zbekistonlik qiz libosida davlat ramzlaridan foydalangani uchun jarimaga tortildi

Toshkentda davlat ramzlariga hurmatsizlik qilgan qiz ma’muriy jazoga tortildi. Kun.uz sud hujjati bilan tanishdi.

Sud qarorida keltirilishicha, 2004 yil Farg‘ona viloyatida tug‘ilgan Sh. 2025 yil 28 oktyabr kuni Filippinning Manila shahrida o‘tkazilgan “Yer go‘zali 2025” ko‘rik-tanlovida ishtirok etgan. U tanlovda O‘zbekiston Respublikasi davlat bayrog‘i hamda gerbi tasvirlangan libosda qatnashgan. Ushbu libosda tushgan suratini esa ijtimoiy tarmoqdagi o‘z sahifasiga joylashtirgan.

Sh. sudda aybiga qisman iqrorlik bildirgan.

“Manila shahrida 25 yildan buyon dunyo bo‘ylab o‘tkazib kelinayotgan “Yer go‘zali 2025” ko‘rik-tanlovida ishtirok etdim. Ushbu tanlovda O‘zbekiston Respublikasi davlat bayrog‘i hamda gerbidan ilhomlanib, libos tiktirdim. Biroq libosimda davlat bayrog‘ida mujassam bo‘lgan ranglar ketma-ketligi bo‘lgani bilan unda tasvirlangan yarim oy va 12 yulduz yo‘q”, degan u sudda.

Qiz suddan o‘ziga nisbatan yengillik so‘ragan.

JIB Mirobod tuman sudining 2026 yil 19 yanvardagi qarori bilan Sh. Ma’muriy javobgarlik to‘g‘risidagi kodeksning 203-1-moddasi 1-qismida nazarda tutilgan huquqbuzarlikni (davlat ramzlari to‘g‘risidagi qonunchilikni buzish) sodir qilishda aybli deb topildi. Unga BHMning 2 baravari (824 ming so‘m) miqdorida jarima jazosi tayinlandi.

Avvalroq o‘zbek so‘mini yoqib, olovida tamaki tutatgan xorijlik ishchilar ma’muriy jazoga tortilgandi.