Toshkentda bir oyda avtobusda chiptasiz yurgan 11,5 ming yo‘lovchi jarimaga tortildi

2026 yil yanvar oyida avtobusda yo‘l haqini to‘lamaganlarga qarshi kuchaytirilgan reyd tadbirlari chog‘ida 11 502 ta ma’muriy bayonnoma rasmiylashtirilgan. Bu haqda Transport vazirligi matbuot xizmati xabar bermoqda.

Qayd etilishicha, «Toshkent shahar yo‘lovchi tashishni monitoring va nazorat qilish» davlat muassasasi nazoratchilari tomonidan avtobuslarda yo‘l haqini to‘lamasdan harakatlanayotgan yo‘lovchilarga qarshi kuchaytirilgan reyd tadbirlari olib borilmoqda.

Yanvar oyi mobaynida avtobuslarda chiptasiz yurgan yo‘lovchilarga nisbatan 11 502 ta ma’muriy bayonnoma rasmiylashtirilib, jarimalar qo‘llangan.

Ma’lumot uchun, Ma’muriy javobgarlik to‘g‘risidagi kodeksning 144-moddasi (Chiptasiz yurish)ga ko‘ra, jamoat transportida yo‘lkira to‘lamagan yo‘lovchiga BHMning o‘ndan bir qismi miqdorida (41 200 so‘m) jarima belgilanadi.

Chiptasiz yurganlarni jarimaga tortish 2025 yil martidan boshlangandi. O‘tgan yil avgust oyida o‘tgan vaqt ichida Toshkent avtobuslarida chiptasiz yurgan 4090 yo‘lovchiga ma’muriy choralar ko‘rilgani xabar qilingandi.

Transport vazirligining 2025 yil mayidagi ma’lumotiga ko‘ra, Toshkent avtobuslari har kuni 1 million 400 mingdan ortiq yo‘lovchi tashiydi.