Cobalt va Damas sotuvi pasaydi, Yuan Up’ga talab keskin oshgan. O‘zbekiston avtomobil bozori sharhi

O‘nlab yillar davomida O‘zbekiston avtomobil bozori sokin va «yopiq makon»ni eslatardi. Ammo, oxirgi vaqtlarda vaziyat qisman bo‘lsada ijobiy tomonga o‘zgardi. Avtosalonlardagi uzundan-uzoq navbatlar va tanlovsizlik o‘rniga xaridorlar futuristik dizayndagi elektromobillar, gibridlar va xorijdan import qilib olib kelinayotgan krossoverlarni sotib olishni afzal ko‘rishyapti.

«O‘zavtosanoat» taqdim qilgan ma’lumotlarga ko‘ra, 2026 yilning yanvar-fevral oylarida mamlakatdagi rasmiy dilerlar tomonidan 57 ming 512 dona avtomobil sotilgan. Bu o‘tgan yilning mos davriga nisbatan 14,1 foiz yoki 7 ming 139 donaga ko‘p. Eng katta o‘sish elektromobillar segmentiga tegishli modellar bilan yuz beryapti.

Joriy yilning dastlabki ikki oyi davomida UzAuto Motors tomonidan taqdim etilgan 10 ta modeldan to‘rttasining sotuvi oshgan, oltitasiga talab sezilarli darajada qisqargan. Xususan, Tracker, Onix, Labo va Tahoe sotuvida o‘sish kuzatilgan bo‘lsa, qimmat segmentdagi mashinalar: Malibu, Captiva, Equinox, Traverse’ga talab tushib ketgan. Shuningdek, milliy kompaniya tomonidan eng ko‘p sotiladigan modellar – Cobalt va Damas sotuvi ham qisqargan. Umuman olganda, hisobot davrida UzAuto Motors ʼning bozordagi ulushi o‘tgan yilning mos davriga nisbatan 82,4 foizdan 79,3 foizgacha qisqargan.

Chevrolet brendiga tegishli bo‘lmagan va eng ko‘p sotilgan avtomobil –. Kia Sonet . O‘z navbatida, Kiaʼning qimmat modellariga talab sezilarli darajada pasaygani qayd etilgan.

2026 yilning ikki oyida UzAuto Motors tomonidan ishlab chiqarilmagan eng ko‘p sotilgan modellar

Kia, Cherry va Haval avtomobillarini yetkazib beruvchi ADM Jizzakhʼning O‘zbekiston bozoridagi ulushi 11,4 foizdan 12,5 foizga, umumiy sotuvlar hajmi esa 5 ming 762 donadan 7 ming 202 donagacha ko‘paygan. BYD ham bozordagi ulushini 5,7 foizdan 8 foizgacha, sotuvlar hajmini 2 ming 862 donadan 4 ming 621 donagacha oshirgan.