“O‘zbekiston bilan hukumatlararo komissiya ishini tiklaymiz” – Ukraina TIV o‘rinbosari

Ukraina Markaziy Osiyo bilan yaqinlashishni boshladi. Tashqi ishlar vazirligida bu mintaqa uchun boshqarma va vazirning maxsus vakili ish boshladi, deydi Toshkentga kelgan vazir o‘rinbosari Oleksanr Mishchenko. Shuningdek, u O‘zbekiston prezidenti va TIVga Ukrainaning suvereniteti, hududiy yaxlitligini qo‘llagani uchun minnatdorlik bildirdi.

“Men O‘zbekistonga Ukraina TIVning Markaziy Osiyo mamlakatlari bilan munosabatlarni sezilarli darajada faollashtirish to‘g‘risidagi qarori ortidan bilan keldim. Biz vazirligimizda Markaziy Osiyo mamlakatlari bilan aloqalar bo‘yicha maxsus bo‘linma, boshqarma tashkil etdik. Shuningdek, vazir Markaziy Osiyodagi ishlar bo‘yicha maxsus vakilni tayinladi. Bu Ukrainaning Qozog‘istondagi elchisi Viktor Mayko bo‘lmoqda. U ham men bilan kelgan. Biz Toshkentda, O‘zbekiston TIVda bo‘ldik, Ukrainaning hududiy yaxlitligi va suverenitetini qo‘llab-quvvatlaganliklari uchun minnatdorlik bildirdim. Biz uchun bu ikki tomonlama munosabatlarni belgilaydigan asosiy masala”, deydi Ukraina TIV o‘rinbosari.

Oleksandr Mishchenkoning qo‘shimcha qilishicha, urush O‘zbekiston va Ukraina savdo-iqtisodiy hamkorligiga jiddiy salbiy ta’sir etgan.

“Urush boshlanguniga qadar tovar aylanmamiz 770 mln dollardan ortiq edi, hozir esa 300 million dollarga tushdi. Biz o‘n yillardan beri yig‘ilmayotgan hukumatlararo komissiya ishini tiklash harakatidamiz. Bizning O‘zbekistonga taklif qiladigan narsalarimiz bor. Mahsulotlarimizni bilishadi, texnologiyalarimizni bilishadi”, deya qo‘shimcha qildi Mishchenko.

Aytish joizki, bu 2022 yilning fevralida urush boshlanganidan beri birinchi marta Ukraina TIVdan O‘zbekistonga delegatsiya kelishi. Mishchenko va vazirning Markaziy Osiyo bo‘yicha maxsus vakili Mayko O‘zbekistondan avval Qozog‘istonda ham bo‘lgan. Diplomatlar O‘zbekistonning gumanitar yordami hamda bolalar uchun dasturidan minnatdor.

“Biz O‘zbekistondan, shaxsan prezidentdan uning dunyoqarashi, Ukrainaning hududiy yaxlitligi va suverenitetini qo‘llab-quvvatlashdagi prinsipial pozitsiyasi uchun minnatdormiz. Bu bizga yanada rivojlanish imkonini beradigan asosiy tamoyildir. O‘zbekiston ko‘rsatgan gumanitar yordam biz uchun juda zarur va hukumatning bolalarni sog‘lomlashtirish bo‘yicha qarori — bu ham umumiy g‘alabamizga qo‘shilgan katta hissa. Hozir men bu yil bolalarni sog‘lomlashtirish dasturi qayta tiklanishi haqidagi qarorni eshitdim, shuningdek, qandaydir gumanitar yordam ko‘rsatish to‘g‘risida ham qaror qabul qilinadi. Biz Ukrainani qo‘llab-quvvatlagan barchadan minnatdormiz. Ko‘proq qo‘llab-quvvatlaydimi, kamroqmi, farqi yo‘q. Asosiysi, qo‘llab-quvvatlayotgani. Bu eng muhimi. Chunki bugun butun sivilizatsiyalashgan dunyo bizni o‘rta asrlarga qaytarmoqchi bo‘lganlarga qarshi kurashish uchun birlashmoqda. Biz esa hammamiz oldinga intilamiz. Biz BMT Nizomining 51-moddasiga muvofiq mudofaa huquqimizni amalga oshirmoqdamiz. Shuning uchun men aytaman, biz O‘zbekistondan minnatdormiz va bir-birimizni o‘zaro qanday qo‘llab-quvvatlashimiz mumkinligi ustida ishlashda davom etamiz”, dedi Ukraina TIV o‘rinbosari.

-Sizga ma’lumki, Rossiyaga qarshi urush paytida ko‘plab sanksiyalar joriy etildi, ammo Rossiya oltin, neft va energiya resurslarini uchinchi davlatlar orqali sotishni davom ettirdi. Bunday mamlakatlarga nima deysiz?

 “Sanksiyalar siyosati ishlamoqda. Ha, shunday mamlakatlar bor, kompaniyalar bor, Rossiya berayotgan preferensiyalardan shu lahzalik manfaat ko‘rishni istaydiganlar. Bunday bo‘lishi mumkin. Men Rossiya kabi nodemokratik mamlakat na parlamentdan, na odamlardan, na biror kishidan so‘ramasligini mutlaqo tushunaman. Ular xohlagan odamga xohlagancha pul to‘lashi mumkin. Masalan, Solovyovning dezinformatsion ishiga juda katta pul to‘lanadi. Siz jurnalist sifatida bunday maoshga ega emassiz va ega bo‘la olmaysiz, chunki Solovyovga to‘lanayotgan pul — bu urush uchun to‘lovdir.

Sanksiyalarga qaytsak, agar uzoq muddatli istiqbollar haqida gapiradigan bo‘lsak, o‘z kelajagi va obro‘si haqida qayg‘uradigan, o‘zini hurmat qiladigan kompaniyalar hech qachon sanksiyalarni chetlab o‘tishga urinmaydi. Mexanizm mavjud. Ha, u, ehtimol, bugun kimligini har doim ham topa olmaydi. Lekin ertaga, indinga bu kompaniyalarni topishadi. Ular ro‘yxatga tushadi, ular uchun barcha bozorlar yopiladi. Va, tabiiyki, obro‘li kompaniya uchun bu dahshatli holat. Lekin shunday bir kunlik kompaniyalar tashkil etiladi, ular orqali nimadir o‘tkaziladi. Xo‘sh, sanksiyalar rejimi, shuning uchun ham biz Yevropa Ittifoqi, g‘arblik sheriklarimiz bilan uni kuchaytirish, ayniqsa, soyadagi flotni kuchaytirish haqida gaplashyapmiz, aytgancha, hozir bu tobora kuchaytirib borilmoqda, chunki

Rossiya shunchaki o‘z kelajagini energetika resurslari, xomashyo ko‘rinishida sotmoqda. Ular 20 yildan keyin Rossiya bilan nima bo‘lishi haqida qayg‘urmaydi. Ular pul olish va urushni davom ettirish uchun sotishyapti. Ular o‘z kelajagini yeb bitirmoqda va aytish mumkinki, o‘z kelajagini o‘ldirmoqda. Lekin biz bunday kompaniyalarga har doim aytamizki, agar siz agressor bilan ishlasangiz, kelajakdagi istiqbollaringiz qanday bo‘lishi haqida o‘ylab ko‘ring” - Oleksandr Mishvhenko, Ukraina TIV o‘rinbosari.

-Ukrainada prezidentlik saylovlari muhokama qilinyaptimi? Bu borada nima deya olasiz?

“Prezident anchadan beri aytib keladiki, sulh tuzilishi bilan Konstitutsiyaga mos sharoitlar paydo bo‘lishi bilan Ukraina saylovlarga tayyor, o‘shanda Ukrainada qonunchilikka muvofiq prezidentlik, parlament saylovlari o‘tkaziladi. Urush davrida, Konstitutsiyaga ko‘ra, biz saylov o‘tkaza olmaymiz, bunga haqqimiz yo‘q, chunki fuqarolarning saylash va saylanish bo‘yicha teng huquqlarini ta’minlay olmaymiz. Bu Konstitutsiyaning asosidir. Shuning uchun bu boshidanoq e’lon qilingan va shuning uchun ham prezident zudlik bilan o‘t ochishni to‘xtatishni va keyin adolatli tinchlik o‘rnatish bo‘yicha muzokaralar olib borishni talab qilmoqda, bu esa darhol bizning ichki siyosiy hayotimiz masalasini ochadi va saylovlar, tabiiyki, Ukraina prezidentining ustuvor yo‘nalishlaridan biridir”- Oleksandr Mishchenko, Ukraina TIV o‘rinbosari

Diplomatga ko‘ra, Kiyev Markaziy Osiyo + formatlariga qo‘shilishni ham muhokamadan o‘tkazmoqda. Suhbatdagi boshqa nutqalar Kun.uz platformalarida alohida e’lon qilinadi.