OFK yangi mavsumdan Chempionlar Ligasi ishtirokchilari sonini oshirmoqchi

Osiyo Futbol Konfederatsiyasi (OFK) Musobaqalar qo‘mitasi 2026/27-mavsumdan boshlab, qit’aning asosiy klublar turniri - Osiyo Chempionlar Ligasi Elita guruh bosqichi ishtirokchilari sonini 24 tadan 32 tagacha oshirishni tavsiya etdi.

Yangi tuzilmada turnir ikkita mintaqaga bo‘linishni saqlab qoladi - sharqiy va g‘arbiy zonalarda 16 tadan klub. Guruh bosqichi natijalariga ko‘ra, har bir mintaqada birinchi-oltinchi o‘rinlarni egallagan jamoalar 1/8 finalga yo‘l oladi. Yettinchi va o‘ninchi o‘rinlarni egallagan klublar pley-off bosqichida kurashni davom ettiradi, uning g‘oliblari 1/8 final bahslariga qo‘shiladi.

Shu bilan birga, xalqaro taqvimning haddan tashqari bandligi sababli 2026/27-mavsumda saralash bosqichi bo‘lmaydi - uni keyingi mavsumlarda joriy etish rejalashtirilgan.

Islohotlar turnirning geografik qamrovini kengaytirish va tijoriy jozibadorligini oshirishga qaratilgan. Barcha qarorlar OFK Ijro qo‘mitasi tomonidan tasdiqlanishi kerak, deyiladi xabarda.

Kvotalar qanday taqsimlanishi keyinroq e’lon qilinadi.