Mart oyida 2,7 mlrd kub gaz qazib olindi. Bu o‘tgan yilning mos davridagidan 30 foizga kam

Milliy statistika qo‘mitasi 2026 yilning yanvar-mart oyidagi sanoat ishlab chiqarish bo‘yicha hisobotni e’lon qildi.

Joriy yilning birinchi choragida gaz qazib olish hajmi 9,6 mlrd kub metrni tashkil etib, 2025 yilning mos davriga nisbatan 1,7 mlrd kub metrga yoki 15 foizga, 2024 yilning mos davriga nisbatan esa 2 mlrd kub metrga yoki 17,2 foizga qisqargan. Xususan, mart oyida 2,7 mlrd kub gaz qazib olingan. Bu o‘tgan yilning shu davriga nisbatan 1,2 mlrd kub yoki 30,8 foizga kam.

Oxirgi yillarda O‘zbekistonda gaz qazib olish dinamikasi quyidagicha o‘zgardi:

Ma’lumot uchun, yanvar-mart oylarida gaz eksporti 36,7 mln dollarni (-61 foiz) tashkil etgan, import hajmi esa qariyb 360,5 mln dollar bo‘lgan. Bu o‘tgan yilning mos davriga nisbatan 2,2 barobar yuqori ko‘rsatkich.

«O‘zbekiston-2030» strategiyasiga ko‘ra, joriy yilda 40,2 mlrd kub metr gaz qazib olinishi kutilyapti. Bu 2025 yilga nisbatan 3,6 foizga yoki 1,5 mlrd kub metrga kam.

Hisob-kitoblarga ko‘ra, keyingi 4 yil davomida gaz qazib olish ko‘rsatkichlari quyidagicha o‘zgaradi:

• 2027 yil – 42,9 mlrd kub (+6,7 foiz);
• 2028 yil – 44,5 mlrd kub (+3,7 foiz);
• 2029 yil – 45,5 mlrd kub (+2,2 foiz);
• 2030 yil – 48,5 mlrd kub (+6,6 foiz).

 Hisobot davrida o‘tgan yilning mos davriga nisbatan neft qazib olish 160,8 ming tonnadan 157,3 ming tonnaga (-1,8 foiz), gaz kondensati ishlab chiqarish 296,6 ming tonnadan 242,3 ming tonnaga (-18,3 foiz) qisqargan. 

O‘z navbatida dizel yonilg‘isi ishlab chiqarish 182 ming tonnadan 280,9 ming tonnaga (+54,3 foiz), benzin ishlab chiqarish 304,3 ming tonnadan 313,2 ming tonnaga (+2,9 foiz) oshgan.

Elektr energiyasi ishlab chiqarish ham umumiy hisobda oshgan. Xususan, 2025 yilning I choragida 21,9 mrld kWh elektr energiyasi ishlab chiqarilgan bo‘lsa, bu ko‘rsatkich joriy yilning mos davrida 22,9 mlrd kWh’ni tashkil etgan. Bunda yirik korxonalar tomonidan ishlab chiqariladigan elektr energiya hajmi 7,5 foizga kamaygan bo‘lsa, kichik tadbirkorlik sub’yektlari tomonidan ishlab chiqarilgan elektr energiyasi hajmi 49 foizga oshgan.

2026 yilning 3 oyida O‘zbekistonda 108 ming 769 dona yengil mashina ishlab chiqarilgan. Bu 2025 yilning yanvar-mart oyidagi ko‘rsatkichdan 11 ming 495 donaga yoki 11,8 foizga ko‘p. Ishlab chiqarishning o‘sishi Damas, Onix, Cherry’dan tashqari barcha avtomobil modellari bilan kuzatilgan.