To‘qayev Qozog‘istonni Oltin O‘rda vorisi deb e’lon qildi

Bu haqda u «Oltin O‘rda cho‘l sivilizatsiyasi modeli sifatida» forumining ochilishida ma’lum qildi, deb xabar berdi Tengrinews.

To‘qayevning so‘zlariga ko‘ra, Qozog‘iston Konstitutsiyasining yangi tahririda Buyuk dasht va uning tarixiy merosi davomiyligi mustahkamlangan. To‘qayevning aytishicha, Jo‘ji ulusining gullab-yashnagan davrida uning hududi 6 million kvadrat kilometrdan oshgan, O‘rdada 100 ga yaqin shahar bo‘lgan va Jo‘jilar sulolasi hukmronligi olti asrdan ortiq davom etgan.

U O‘rdaning pul tizimiga alohida e’tibor qaratdi. Mutaxassislarning fikriga ko‘ra, taxminan 28 million kumush tanga zarb qilingan. Qozog‘iston milliy valutasi - tenge nomi O‘rda «dang»iga borib taqalishi ramziy ma’noga ega. «Bu Oltin O‘rda mintaqada pul munosabatlari standartlariga asos solganidan dalolat beradi», dedi To‘qayev.

Qozog‘iston Milliy banki yaqinda Oltin O‘rdaga bag‘ishlangan mingta kumush tanga chiqardi.

Prezident Oltin O‘rda tarixini qayta ko‘rib chiqish zarurligini ta’kidlab, tarixiy merosni nizo quroliga aylantirmaslikka chaqirdi. O‘rda XIII-XV asrlarda rus yerlarining kattagina qismi ustidan hukmronlik o‘rnatdi: rus knyazliklari vassal qaramlikda bo‘lib, xonlarga o‘lpon to‘lar va knyazlik qilishga ruxsat olar edi. O‘rda knyazliklarning siyosiy tizimiga ta’sir o‘tkazib, ularning ichki nizolariga aralashgan. XV asr oxiriga kelib, qaramlik zaiflashdi va 1480 yildan keyin, Moskva o‘lpon to‘lashni to‘xtatgach va O‘rda rus yerlari ustidan nazoratni yo‘qotdi.