Toshkentdan voha viloyatlariga qo‘shimcha avtobus reyslari yo‘lga qo‘yildi

Qurbon hayiti bayrami arafasida Toshkent avtovokzalidan qo‘shimcha avtobus reyslari tashkil etildi.

Xabar qilinishicha, Toshkentdan Sirdaryo orqali voha viloyatlariga qatnovchi doimiy 65 ta avtobus yo‘nalishiga yana 55 ta qo‘shimcha reys yo‘lga qo‘yildi.

Yo‘lovchilar soniga qarab qo‘shimcha reyslar soni yana oshirilishi mumkinligi aytilmoqda.

Shuningdek, bayram kunlarida xalqaro ahamiyatdagi avtomobil yo‘llarida YPX xodimlarining kuchaytirilgan tartibdagi xizmati tashkil etiladi.

Qayd etilishicha, haydovchilar bilan yo‘lkira narxlarini sun’iy oshirmaslik, qatnov oldidan yetarli dam olish hamda yo‘l harakati qoidalariga qat’iy rioya qilishlarini ta’minlash maqsadida profilaktik tadbirlar olib borilmoqda.

Eslatib o‘tamiz, O‘zbekistonda Qurbon hayiti 27 may chorshanba kuni nishonlanadi. Bayram munosabati bilan o‘zbekistonliklar ketma-ket 5 kun dam oladilar.