AQSh mamlakat ichidagi chet elliklardan Green Card arizalari qabul qilishni cheklaydi

AQSh Immigratsiya va fuqarolik xizmati (USCIS) doimiy yashash guvohnomasi olishni xohlovchi chet elliklar uchun yangi qoidalar joriy qilyapti. Bundan keyin Qo‘shma Shtatlarda vaqtincha yurgan chet el fuqarolari Green Card’ga murojaat qilish uchun maqomini mamlakat ichida o‘zgartira olmaydi.

Mamlakatga noimmigratsion vizalar bilan kelgan chet elliklar faqat “istisno holatlarda” yashash uchun ruxsatnoma olishlari mumkin bo‘ladi. Yangi yondashuv immigratsiya qonunchiligining dastlabki maqsadlariga mos kelishi hamda mavjud tizimdagi bo‘shliqlardan foydalanish holatlarini qisqartirishga xizmat qilishi ta’kidlanyapti.

“Biz chet elliklarning mamlakatimiz immigratsiya tizimida to‘g‘ri harakatlanishini ta’minlash uchun qonunning asl mohiyatiga qaytmoqdamiz. Bundan buyon AQShda vaqtincha istiqomat qilayotgan va Green Card olmoqchi bo‘lgan chet el fuqarosi ariza topshirish uchun o‘z vataniga qaytishi shart. Ushbu siyosat immigratsiya tizimimizga qonundagi bo‘shliqlarni rag‘batlantirish o‘rniga, uning asl maqsadiga muvofiq ishlash imkonini beradi. Chet elliklar o‘z vatanidan turib ariza topshirsa, yashash huquqi rad etilgach, noqonuniy yashirinib qolishga qaror qilganlarni topish va mamlakatdan chiqarib yuborish zarurati kamayadi”, — dedi USCIS matbuot kotibi Zak Kahler.

Mazkur tartib USCIS resurslarini odam savdosi qurbonlari, fuqarolik olish arizalari va boshqa ustuvor vazifalarga yo‘naltirish hamda tizimni adolatliroq va samaraliroq qilishga yordam berishi kutilmoqda, deyiladi bayonotda.

Avvalroq, AQSh Green Card bo‘yicha yangi shartlarni e’lon qilgandi. Asosiy talablar: amaldagi xorijga chiqish pasportining mavjudligi va pasport skanerini yuklash. Shuningdek, ro‘yxatdan o‘tish uchun 1 dollar to‘lov. Qoidalar 2026 yil 11 apreldan kuchga kirdi.