Zelenskiy Trampga xat yozib, Ukrainani Rossiya raketalaridan himoya qilishni so‘radi

Ukraina prezidenti Volodimir Zelenskiy Donald Tramp va AQSh Kongressiga maktub yo‘llab, unda Ukrainada havo hujumidan mudofaa tizimlari yetishmayotganini ma’lum qildi, deb xabar berdi Kyiv Independent. Xat matnini Axios jurnalisti Barak Ravid e’lon qildi.

Zelenskiyning so‘zlariga ko‘ra, Ukraina dronlardan himoyalanishda sezilarli yutuqlarga erishgan, ammo hozircha o‘zining raketaga qarshi mudofaa tizimlarini ishlab chiqara olmaydi.

«Raketaga qarshi mudofaa masalalarida biz butun dunyodagi do‘stlarimiz va hamkorlarimizga tayanamiz. Ballistik raketalardan himoyalanishda esa biz deyarli faqat Qo‘shma Shtatlarga tayanamiz», deb yozdi Zelenskiy.

Uning ta’kidlashicha, Patriot tizimlari «Rossiyaning barcha turdagi ballistik raketalariga qarshi eng samarali himoya bo‘lib qolmoqda». «Va aynan Ukraina qo‘lida Patriot tizimlari juda muhim narsani isbotladi: Rossiyaning aksariyat raketalarini to‘xtatish mumkin», dedi prezident.

Zelenskiyning qo‘shimcha qilishicha, PURL dasturi bo‘yicha qurol yetkazib berishning hozirgi sur’atlari «biz duch kelayotgan tahdid haqiqatiga mos kelmaydi».

«Sizdan Ukraina havo hududini Rossiya raketalaridan himoya qilishda yordam berishingizni so‘rayman», dedi u.

PURL — NATO alyansining Ukraina uchun Amerika qurollarini Yevropa davlatlari mablag‘lari hisobiga sotib olish tashabbusi. Financial Times yozganidek, Yaqin Sharqdagi urush fonida AQSh Yevropani qurol-yarog‘, jumladan, Ukraina foydalanadigan o‘q-dorilar yetkazib berishni kechiktirishi haqida ogohlantirgan. Ukraina prezidenti idorasi 19 may kuni PURL dasturi bo‘yicha ta’minot davom etayotganini ma’lum qildi.