Davlatga qaytgan neft zavodi va Toshkent viloyatida to‘plangan hokimlar - mahalliy dayjest

2022 yilda xususiylashtirilgan Farg‘ona neftni qayta ishlash zavodi (FNQZ) yana to‘liq davlat ixtiyoriga qaytdi. Barcha hokimlar yirik investitsiyaviy, sanoat va turizm loyihalari bilan tanishish hamda ilg‘or tajribalarni o‘rganish maqsadida Toshkent viloyatida to‘plandi. Sergeli mashina bozorida «noqonuniy savdogarlar» fotosurati ilib qo‘yildi. Qashqadaryo viloyatida maishiy gaz ballonlariga suyultirilgan gaz quyish shoxobchasida portlash sodir bo‘ldi. Surxondaryoda IIB xodimi voyaga yetmagan qizning nomusiga tegishda gumon qilinmoqda. Kunning muhim yangiliklari bilan tanishtiramiz.

Farg‘ona neftni qayta ishlash zavodi (FNQZ) yana to‘liq davlat ixtiyoriga qaytdi

Korxona va tashkilotlarning yagona davlat reyestridagi ma’lumotlarga ko‘ra, 8 iyun holatiga zavodning 100 foizlik egasi sifatida Davlat aktivlarini boshqarish agentligi (Davaktiv) ko‘rsatilgan.

2022 yil may oyida «Sanoat energetika guruhi» MChJ (Saneg) FNQZ 100 foiz ulushini ayrim majburiyatlar bilan 100 mln dollarga xususiylashtirib olgandi. Shundan keyin zavod 2023 yilda 469,6 mlrd so‘m, 2024 yilda esa 220 mlrd so‘m sof foyda ko‘rdi. Xususiylashtirish bitimi tuzilganidan keyin ham yillar davomida FNQZ 58,5 foiz nazorat paketi Davaktiv ixtiyorida qolayotgandi. Bu kelishilgan pul davlatga to‘liq to‘lanmagani bilan izohlandi.

2025 yilda zavodning moliyaviy holati yomonlashdi va 538,1 mlrd so‘m miqdoridagi sof zarar bilan yakunladi. Bu valuta kurslari farqining ta’siri bilan izohlangan edi.

Barcha hokimlar Toshkent viloyatida to‘plandi

Qoraqalpog‘iston Respublikasi Vazirlar Kengashi raisi, viloyatlar va Toshkent shahri hokimlari yirik investitsiyaviy, sanoat va turizm loyihalari bilan tanishish hamda ilg‘or tajribalarni o‘rganish maqsadida Toshkent viloyatida to‘plandi.

Mehmonlar Chorvoq darvozasi, Bo‘stonliq tumanida joylashgan «Ugam River» markazi, «Chimyon» turistik majmuasi hududidagi «Za’faron» mehmonxonasi faoliyati bilan tanishdi, sharoitlar va servis xizmatlari darajasini ko‘zdan kechirdi. Dastur doirasida «Chirchiq» kimyo-industrial texnoparki faoliyati bilan ham tanishish rejalashtirilgan.

Ta’kidlanishicha, mazkur amaliyot hududlar o‘rtasida tajriba almashish, muvaffaqiyatli loyihalarni ommalashtirish hamda iqtisodiy rivojlanishning samarali modellarini keng joriy etishga xizmat qiladi.

Sergeli mashina bozorida «noqonuniy savdogarlar» fotosurati ilib qo‘yildi

Toshkentdagi Sergeli avtomobil bozori hududida e’lonlar taxtasiga jami 40 nafar shaxsning fotosurati osildi. Bozor ma’muriyati ushbu shaxslar noqonuniy savdo bilan shug‘ullanib kelganini ta’kidlagan holda, xaridor va sotuvchilarni aldanib qolmaslikka chaqirmoqda.

May oyining oxirida Sergeli avtomobil bozorida tezkor tadbir o‘tkazilib, vositachilik va olibsotarlik faoliyati bilan noqonuniy shug‘ullangan 100 kishi aniqlangani va ulardan 30 nafariga nisbatan ma’muriy qamoq yoki jarima jazosi tayinlangani ma’lum bo‘lgan edi.

Xalq tilida «saygaklar» deb ataluvchi ushbu shaxslar xaridor va sotuvchi o‘rtasida bevosita muloqotning kamayishiga va narxning sun’iy oshishiga sababchi bo‘lib kelgani ta’kidlanadi.

Qashqadaryoda gaz quyish shoxobchasi portladi

Qashqadaryo viloyatining Qarshi tumanida joylashgan maishiy gaz ballonlariga suyultirilgan gaz quyish shoxobchasida portlash sodir bo‘ldi.

FVV matbuot xizmati Qarshi tumani «Chaman» MFY hududidagi maishiy gazballonlariga suyultirilgan gaz quyish shoxobchasida ro‘y bergan portlash oqibatlari haqida rasmiy ma’lumot berdi.

Unga ko‘ra, hodisa oqibatida 4 ta avtomobil hamda 2 ta yer ostidagi yoqilg‘i saqlash rezervuari yonib zararlangan. 6 kishi halok bo‘lib, yana 5 kishi turli darajadagi tan jarohatlari bilan shifoxonaga yotqizilgan.

Hodisa yuzasidan Ramatov boshchiligida Hukumat komissiyasi tashkil etildi.

Surxondaryoda IIB xodimi voyaga yetmagan qizning nomusiga tegishda gumon qilinmoqda

Denov tumanida voyaga yetmaganlar masalalari bo‘yicha sobiq inspektor-psixolog voyaga yetmagan qizning nomusiga tegishda gumon qilinmoqda.

Unga nisbatan Jinoyat kodeksining bir necha moddalari — 14 yoshga to‘lmagan shaxsning nomusiga tegish; zo‘rlik ishlatib yoki qo‘rqitib 16 yoshga to‘lmagan shaxsga nisbatan uyatsiz-buzuq harakatlar qilish; hokimiyat yoki mansab vakolati doirasidan chetga chiqish kabi moddalari bo‘yicha ish ochilgan. Hujjatlar sudga yuborilgan.

Avvalroq, Andijon viloyatida voyaga yetmaganlarga ijtimoiy-huquqiy yordam ko‘rsatish inspektori 15 yoshli qiz bilan jinsiy aloqada bo‘lishda gumon qilinayotgani xabar berilgan edi.