Xominaiy o‘ldirilgach, Rossiyada Putinni qo‘riqlash uchun yaratilgan kuzatuv tizimi o‘chirib qo‘yildi

Financial Times (FT) nashriga ikki xabardor manbaning aytishicha, maxsus xizmatlar tizimni sinchkovlik bilan tekshirib, uni internetdan imkon qadar izolyatsiya qilishga uringan, shundan so‘ng uni qayta yoqishgan. Bu tizim Moskva ko‘chalarida o‘rnatilgan 300 mingga yaqin kameralardan alohida ishlaydi.

Fevral oyi oxirida Eron oliy rahbari Ali Xominaiy o‘ldirilgandan so‘ng, Isroil razvedkasi Tehron yo‘llaridagi kuzatuv kameralarini buzib kirgani va ulardan yillar davomida ma’lumot olgani ma’lum bo‘ldi. Ushbu kameralardan olingan ma’lumotlar Isroil harbiylariga Xominaiy o‘ldirilgan havo hujumini tayyorlashga yordam bergan.

FT nashrining ta’kidlashicha, hakerlar yoki xorijiy razvedka organlari tomonidan kuzatuv tizimlarini buzish yangilik emas. Biroq, hozir sun’iy intellekt berilgan so‘rovlarga mos keladigan obektlarni topish uchun minglab kameralardan millionlab soatlik videolarni tahlil qilish imkonini berayotgan bir paytda, ruxsatsiz ulanish ayniqsa xavflidir.

Nashrning yozishicha, eronliklar ham Isroilning videokuzatuv tizimlarini buzib kirishga muvaffaq bo‘lgan, biroq uzluksiz tasvir oqimini qayta ishlash imkonini beruvchi vosita bo‘lmasa, bunday buzib kirishning foydasi cheklangan edi.

May oyi boshida Yevropa davlatlaridan birining razvedkasi Rossiya prezidentining xavfsizligiga mas’ul bo‘lgan Federal xavfsizlik xizmati (FXX) Vladimir Putinga suiqasd qilinishidan qo‘rqqani sababli uni himoya qilish choralarini sezilarli darajada kuchaytirgani haqida xabar bergan edi. FT nashrining ta’kidlashicha, bunday tahdid Rossiyadagi kuzatuv kameralariga ulanishga muvaffaq bo‘lgan, shuningdek, yuqori martabali rus harbiylariga suiqasdni tayyorlashda mobil telefon ma’lumotlarini kuzatgan Ukraina maxsus xizmatlaridan kelib chiqqan bo‘lishi mumkin.

FT ta’kidlaganidek, rasmiylarga aloqasi bo‘lmagan ukrainalik hakerning so‘zlariga ko‘ra, Kremldagi videokameralar «hali ham ishlaydi va ular muntazam ravishda buzib kirilmoqda». U Ukraina kameralardan olingan ma’lumotlarni tahlil qilish uchun resurslarga ega yoki yo‘qligini aytishdan bosh tortdi. Nashrning ta’kidlashicha, tegishli vositalar AQSh va Buyuk Britaniyada mavjud bo‘lib, ular muntazam ravishda Ukrainaga zarbalar uchun ma’lumotlarni yetkazib turadi.