Sudlarda korrupsiyaga qarshi yangi choralar va harbiy sohada yangi qo‘mondonlik - mahalliy dayjest

Sud xodimlarining daromadi va mol-mulki deklaratsiya qilinadi. Harbiy havo kuchlari jangovar qo‘mondonligi tashkil etildi. Buvayda hokimining sobiq o‘rinbosari jinoiy jazoga tortildi. Farg‘onada Soliq Mobile orqali 3,2 mlrd so‘mlik keshbek talon-toroj qilindi. Buxorodagi tergov hibsxonasi xodimlariga nisbatan tekshiruv boshlandi. Kunning muhim yangiliklari bilan tanishtiramiz.

Sud xodimlarining daromadi va mol-mulki deklaratsiya qilinadi

Prezident Shavkat Mirziyoyev sudlarda korrupsiyaning oldini olish maqsadida komplayens nazorat tizimi samaradorligini oshirishga oid taqdimot bilan tanishdi.

Unda qayd qilinishicha, sud tizimida korrupsiyaviy xavf-xatarlarni barvaqt aniqlash, manfaatlar to‘qnashuvining oldini olish va xodimlarning kasbiy mas’uliyatini yuksaltirish muhim vazifa bo‘lib qolmoqda. Shu munosabat bilan taqdimotda sudlarda komplayens nazoratini kuchaytirishga qaratilgan takliflar muhokama qilindi. Sud apparati xodimlari orasida korrupsiyaning oldini olish maqsadida Oliy sud tarkibida Komplayens nazorati xizmatini tashkil etish taklif etildi. Mazkur xizmat Oliy sud raisiga bo‘ysunib, hududiy sudlarda ham faoliyat olib boruvchi komplayens inspektorlaridan iborat bo‘ladi. Komplayens xizmati korrupsiyaviy xavf-xatarlarni aniqlash, baholash va oldini olish, ularning sabablarini bartaraf etish, xodimlar tomonidan qonunchilik va kasb etikasi talablariga rioya etilishini monitoring qilish bilan shug‘ullanadi.

Sudyalar uchun manfaatlar to‘qnashuvi, daromad va mol-mulk deklaratsiyalarini taqdim etish hamda tahlil qilishning avtomatlashtirilgan elektron tizimi ishga tushiriladi. Xuddi shunday tizim sud apparati xodimlari uchun ham joriy etiladi.

Harbiy havo kuchlari jangovar qo‘mondonligi tashkil etildi

O‘zbekistonda Havo hujumidan mudofaa qo‘shinlari va Harbiy havo kuchlari qo‘mondonligi negizida Qurolli kuchlar Harbiy havo kuchlari jangovar qo‘mondonligi tashkil etiladi. Bu haqda davlat rahbari huzuridagi taqdimotdan keyin mudofaa vaziri Shuhrat Xolmuhammedov ma’lum qildi.

Vazir so‘zlariga ko‘ra, prezident Shavkat Mirziyoyev Harbiy havo kuchlari jangovar qo‘mondonligini tashkil etishga oid «tarixiy farmon»ni imzolagan (hujjat hali e’lon qilinmadi). Yangi tashkil etilayotgan qo‘mondonlik zamonaviy raqamlashtirilgan boshqaruv tizimiga ega bo‘lishi ko‘zda tutilgan.

Uning qo‘shimcha qilishicha, prezident harbiy tibbiyot sohasidagi hamkorlikka doir O‘zbekiston–Turkiya hukumatlararo bitimni tasdiqlash to‘g‘risidagi qarorni ham imzoladi. Bitimga ko‘ra, davolash ishi, stomatologiya, farmatsevtika, profilaktika, tibbiy kasb-hunar va hamshiralik kabi yo‘nalishlarda mutaxassislarni o‘qitish, qayta tayyorlash, malakasini oshirish, o‘zaro tajriba almashish va bemorlarni davolash borasida hamkorlik qilish belgilanmoqda.

Buvayda hokimining sobiq o‘rinbosari jinoiy jazoga tortildi

Farg‘ona viloyati Buvayda tumani hokimining qurilish, to‘siqlarsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari lavozimida ishlagan Sayidjon Xizirov jinoiy jazoga tortildi. Kun.uz sud hujjati bilan tanishdi.

Sud hukmida qayd qilinishicha, Sayidjon Xizirov aholi daraxtlar kesilishiga qarshilik qilayotganidan xabar topib, hodisa joyiga borgan. U daraxt kesmoqchi bo‘lgan ishchini to‘xtatishga uringan ekologiya inspektori Ahrorjon Niyozovning yoqasidan tortib, xizmat vazifalarini bajarishdan voz kechishga majbur qilgan. Oqibatda ekologiya inspektoriga yengil jarohat yetkazgan.

Sud hukmi bilan Sayidjon Xizirov Jinoyat kodeksining 206-moddasi (hokimiyat yoki mansab vakolati doirasidan chetga chiqish) 1-qismida nazarda tutilgan jinoyatni sodir qilishda aybli deb topildi. Unga 1 yil mansabdorlik va moddiy javobgarlik yuklatilgan lavozimlarda ishlash huquqidan mahrum qilgan holda BHM 150 baravari miqdorida (61 mln 800 ming so‘m) jarima jazosi tayinlangan.

Farg‘onada Soliq Mobile orqali 3,2 mlrd so‘mlik keshbek talon-toroj qilindi

Farg‘ona viloyatida bir guruh shaxslar Soliq Mobile ilovasidagi keshbek tizimidan noqonuniy foydalanib, davlat budjeti mablag‘larini talon-toroj qilgani aniqlandi. Tergovga qadar tekshiruvda ular soxta elektron hisob-fakturalar va xarid cheklarini rasmiylashtirish orqali 3,2 mlrd so‘m keshbek mablag‘ini o‘zlashtirganlikda gumon qilinmoqda.

Bosh prokuratura huzuridagi Departamentning Farg‘ona viloyati boshqarmasi ma’lum qilishicha, bir qancha fuqarolar o‘zaro til biriktirib, Telegram ijtimoiy tarmog‘ida turli nomlardagi guruhlar tashkil etgan. Ular mazkur guruhlar orqali 7 ta korxona nomidan rasmiylashtirilgan xarid cheklari uchun keshbek summalarini onlayn tarzda sotish bilan shug‘ullangan.

Tekshiruvda aniqlanishicha, mazkur korxonalar tomonidan hech qanday real moliyaviy operatsiyalar amalga oshirilmagan bo‘lsa-da, go‘yoki 3,3 trln so‘mlik mahsulot va xizmatlar sotilgani haqida soxta elektron hisob-fakturalar rasmiylashtirilgan. Shuningdek, savdodan tushgan mablag‘lar onlayn nazorat-kassa mashinalari orqali kirim qilingani haqida ma’lumotlar shakllantirilib, xarid cheklari tarqatilgan.

Buxorodagi tergov hibsxonasi xodimlariga nisbatan tekshiruv boshlandi

Ijtimoiy tarmoqlarda Buxoro viloyatidagi 4-son tergov hibsxonasida saqlanayotgan shaxsga nisbatan qiynoq qo‘llanayotgani haqida tarqalgan xabarlar yuzasidan ayrim xodimlarga nisbatan tergovga qadar tekshiruv harakatlari boshlandi. Holat Ombudsman tomonidan nazoratga olingan.

Ma’lum qilinishicha, holat yuzasidan 4-son tergov hibsxonasining ayrim xodimlariga nisbatan tergovga qadar tekshiruv harakatlari boshlangan. Shu bilan birga, murojaatda ko‘rsatilgan shaxsga nisbatan sud-tibbiy ekspertiza tayinlangan.

O‘rganish jarayonida to‘plangan hujjatlar va materiallar Jinoyat-protsessual kodeksi talablariga muvofiq protsessual tartibda ko‘rib chiqish uchun Buxoro viloyati prokuraturasiga taqdim etilgan.