Qoidabuzar haydovchilar uchun yangi jazolar va Chirchiq daryosi qirg‘og‘ida o‘pirilish - mahalliy dayjest

Mehnat kodeksida jamoaviy ish tashlashni amalga oshirish tartibi belgilandi. Qo‘pol yo‘l qoidabuzarliklari uchun avtomobil musodara qilinishi mumkin. Chirchiq daryosi qirg‘og‘ining bir qismi o‘pirildi, uni tiklash ishlari boshlandi. Renovatsiya qonuni: rozilik olish va kompensatsiya tartibi belgilandi. Toshkentda xavfli harakatlangan avtomobil o‘q uzib to‘xtatildi. Kunning muhim yangiliklari bilan tanishtiramiz.

Ish tashlashni amalga oshirish tartibi belgilandi

Mehnat kodeksiga kiritilgan o‘zgartirishlarga ko‘ra, agar yarashtirish taomillari orqali jamoaviy mehnat nizosini hal qilishning iloji bo‘lmasa, mehnat jamoasi ish tashlash to‘g‘risida qaror qabul qilishi mumkin.

Ish tashlashni e’lon qilish to‘g‘risidagi qaror tashkilot xodimlari yig‘ilishida qabul qilinadi, bu ish tashlash boshlanishidan kamida 1 oy oldin amalga oshiriladi.

Ish tashlash insonlarning hayoti va sog‘lig‘iga zarar yetkazish real xavfini keltirib chiqarsa, tinchlik va xavfsizlikka, jamoat xavfsizligi va jamoat tartibiga, ekologik barqarorlikka tahdid solsa, sudning qaroriga asosan 30 kalendar kundan ko‘p bo‘lmagan muddatga kechiktirilishi yoki to‘xtatib turilishi mumkin.

Favqulodda holat yoki favqulodda vaziyatlar paytida, urush holatida, umumiy safarbarlik e’lon qilingan davrda ish tashlash taqiqlanadi. Qonun rasmiy e’lon qilingan kundan e’tiboran 3 oy o‘tgach kuchga kiradi.

Qo‘pol yo‘l qoidabuzarliklari uchun avtomobil musodara qilinishi mumkin

O‘zbekistonda qo‘pol yo‘l qoidabuzarliklari uchun transportni vaqtincha olib qo‘yish yoki musodara qilish choralarini joriy etish taklif qilindi. Bu haqda YHXX boshlig‘i Sherzod Ibrohimov «O‘zbekiston 24» telekanaliga bergan intervyusida aytib o‘tdi.

Qayd etilishicha, yo‘llarda yo‘l-transport hodisalarining oldini olish maqsadida idoralararo ishchi guruh tomonidan yo‘l harakati qoidalarini buzganlik uchun javobgarlikni takomillashtirishga qaratilgan takliflar ishlab chiqilgan va davlat rahbariga taqdim etilgan.

Shu bois besh turdagi qo‘pol qoidabuzarliklar uchun ma’muriy jazo chorasi sifatida avtotransport vositasini vaqtincha olib qo‘yish jazo chorasini kiritish taklif etilmoqda.

Chirchiq daryosi qirg‘og‘ining bir qismi o‘pirildi

11 iyun kuni Toshkent shahri, Bektemir tumani, Nurafshon mahallasi hududidan oqib o‘tuvchi Chirchiq daryosida joylashgan «Suv so‘ndirgich» inshootining oqim bo‘ylab o‘ng nishabligidagi beton qoplamasi hamda qirg‘oq bo‘yi mintaqasida o‘pirilish sodir bo‘ldi.

Suv xo‘jaligi vazirligi xabariga ko‘ra, hodisa oqibatida atrofdagi bino-inshootlar, obektlar hamda aholi xonadonlariga zarar yetmagan, ayni vaqtda ular uchun hech qanday xavf mavjud emas.

Ta’kidlanishicha, sodir bo‘lgan o‘pirilish holatini bartaraf etish uchun qirg‘oqni mustahkamlash ishlari olib borilmoqda.

Renovatsiya qonuni: rozilik olish va kompensatsiya tartibi belgilandi

Prezident 10 iyun kuni “Shaharsozlik renovatsiyasi to‘g‘risida”gi qonunni imzoladi. Qonun eskirgan uylar va noturar joylar o‘rnida yangilarini barpo etishni ko‘zda tutuvchi loyihalarni amalga oshirish qoidalarini belgilaydi.

Hujjatdagi ta’rifga ko‘ra, shaharsozlik renovatsiyasi – hududni me’moriy, ijtimoiy, iqtisodiy va ekologik jihatdan yaxshilash, hududdagi bino-inshootlarni yashash uchun qulay va energiya samarador holatga keltirish demakdir.

Renovatsiya loyihasi hududiy hokimlik tomonidan ko‘rib chiqishga qabul qilinishi uchun mulkiy huquq egalarining kamida beshdan to‘rt qismining notarial tasdiqlangan yozma roziligi talab etiladi. Mulkiy huquq egasi o‘z xohishiga ko‘ra kompensatsiya olishi yoki renovatsiya loyihasida hissa qo‘shuvchi sifatida ishtirok etishi mumkin.

Qonun 6 oydan keyin – 2026 yil 12 dekabrdan kuchga kiradi.

Toshkentda xavfli harakatlangan avtomobil o‘q uzib to‘xtatildi

Toshkent shahrida ichki ishlar organlari xodimlarining to‘xtash haqidagi qonuniy talabiga bo‘ysunmasdan xavfli harakatlangan Cobalt rusumli avtomobil o‘q uzish orqali to‘xtatildi. Bu haqda poytaxt IIBB matbuot xizmati xabar berdi.

Ijtimoiy tarmoqlarda tarqalgan videolarda Cobalt rusumli avtomashina bir nechta transport vositalariga shikast yetkazib, to‘xtamasdan ketib qolganini ko‘rish mumkin. Ta’kidlanishicha, avtomobilni ruhiy-asab kasalliklari shifoxonasida ro‘yxatda turuvchi 44 yoshli R.Y. boshqargan.

Holat yuzasidan tergovga qadar tekshiruv o‘tkazilmoqda.