O‘zbekiston fuqarolari konsullik xizmatlaridan mobil ilova orqali foydalanishlari mumkin bo‘ldi

Xorijda yashovchi yoki chet elga sayohat qilishni rejalashtirayotgan O‘zbekiston fuqarolari uchun konsullik masalalarini tezkor va masofadan turib hal etish, barcha zarur ma’lumotlarni bevosita texnik qurilma orqali taqdim etishga mo‘ljallangan mobil ilova ishga tushirildi.

Ilovada O‘zbekistonning xorijdagi diplomatik vakolatxonalari va konsullik muassasalarining yagona ma’lumotlar bazasi shakllantirilgan.

Foydalanuvchilar elchixonalar va konsulliklarning manzillari, aloqa ma’lumotlari va joylashuvi to‘g‘risidagi dolzarb ma’lumotlarni olishi, shuningdek, turgan mamlakat yoki mintaqa tegishli bo‘lgan konsullik okrugini aniqlashi mumkin.

Dastlabki bosqichda ilova orqali O‘zbekistonga qaytish uchun sertifikatni rasmiylashtirish hamda vaqtinchalik yoki doimiy konsullik ro‘yxatidan o‘tish kabi xizmatlar ko‘rsatiladi. Kelgusida elektron xizmatlar ro‘yxatini kengaytirib borish rejalashtirilgan.

Platformada anketa va arizalarni avtomatik to‘ldirish tizimi mavjud. Majburiy maydonlarning qariyb 80 foizi avtomatik tarzda to‘ldirilishi hujjatlarni rasmiylashtirish vaqtini sezilarli darajada qisqartiradi va murojaat yuborish jarayonini osonlashtiradi.

Bundan tashqari, mobil ilovada O‘zbekiston fuqarolari uchun xorijiy davlatlarning viza talablariga bag‘ishlangan axborot bo‘limi ham mavjud. Ayni paytda ushbu xizmat sinov rejimida ishlamoqda ma’lumotlar bilan to‘ldirib borilmoqda.

Google Play (Android):

https://play.google.com/store/apps/details?id=consular_services_uzb.org&hl=ru

App Store (iOS):

https://apps.apple.com/us/developer/mfa-uz/id1818537775