Samarqandda Rossiyada ishlashni rejalashtirayotgan fuqarolar uchun test markazi ochiladi

O‘zbekiston tashqi ishlar vaziri o‘rinbosari Olimjon Abdullayevning Sankt-Peterburg shahriga amaliy tashrifi doirasida Sankt-Peterburg va Leningrad viloyati hukumatlari rahbariyati hamda boshqa muassasa va tashkilotlar vakillari bilan muzokaralar bo‘lib o‘tdi.

Foto: O‘zbekiston Respublikasi tashqi ishlar vazirligi

Tashrif davomida Xalqaro mehnat migratsiyasiga ko‘maklashish assotsiatsiyasi bilan Samarqand viloyatida rus tili, Rossiya tarixi va qonunchiligi bo‘yicha test sinovlarini o‘tkazish markazini ochish haqida kelishuvga erishildi.

Sankt-Peterburg va Leningrad viloyati inson huquqlari hamda bola huquqlari bo‘yicha vakillari, shuningdek Xalqaro advokatlar kollegiyasi rahbariyati bilan uchrashuvlar yakunlari bo‘yicha huquqiy yordam ko‘rsatish sohasidagi hamkorlikni kengaytirish va tezkor hamkorlik mexanizmlarini takomillashtirishga oid kelishuvlar tuzildi.

Tashrif doirasida delegatsiya Leningrad viloyati Xorijiy fuqarolarni vaqtincha saqlash markazida ham bo‘lib, u yerda saqlanayotgan O‘zbekiston fuqarolari uchun yaratilgan sharoitlar bilan tanishdi.

Muassasa rahbariyati bilan zarur hujjatlarni rasmiylashtirish jarayonlarini jadallashtirish va fuqarolarning vatanga tezroq qaytarilishini ta’minlash bo‘yicha chora-tadbirlar kelishib olindi.