Mahkumlar uchun yengillik va eski avtomobillar uchun ekologik kompensatsiya - mahalliy dayjest 

Toshkentda renovatsiyaning birinchi bosqichi boshlandi, mahallalarda maxsus shtablar tuzildi. Eski avtomobil egasi ekologik kompensatsiya to‘lashi kerakligi haqidagi qonun loyihasi muhokamaga qo‘yildi. O‘qigan har bir kitob uchun mahkumning jazo muddati uch kunga qisqartiriladigan bo‘ldi. Samarqandda YTH sodir qilgan Damas haydovchisi mashinadan tushib qoldi. Kunning muhim yangiliklari bilan tanishtiramiz.

Toshkentda renovatsiyaning birinchi bosqichi boshlandi

Unda aholi, tashabbuskor guruhlar va loyiha ishtirokchilariga renovatsiya jarayoni, ko‘chirish shartlari, kompensatsiya tartibi hamda boshqa muhim masalalar yuzasidan batafsil ma’lumot berish ko‘zda tutilgan.

Bosqich doirasida Yashnobod tumanidagi Jarqo‘rg‘on, Mirobod tumanidagi Fitrat hamda Sergeli tumanidagi Xonobodtepa mahallalarida maxsus shtab ish boshladi.

Shtab tarkibiga hokimlik, prokuratura, ichki ishlar organlari, Milliy gvardiya, soliq idorasi, Majburiy ijro byurosi, kommunal xizmat, kadastr, adliya va qurilish tashkilotlari vakillari, shuningdek, gaz, elektr energiyasi, suv va issiqlik ta’minoti sohasi mutaxassislari, banklar hamda notariat idoralari jalb qilingan. Ta’kidlanishicha, shtabning asosiy vazifasi aholi bilan bevosita muloqot qilish, renovatsiya mexanizmlarini tushuntirish, fuqarolarning savollariga javob berish, ularning taklif va mulohazalarini o‘rganish hamda har bir oilaning o‘ziga xos holatlarini inobatga olishdan iborat.

Eski avtomobil egasi ekologik kompensatsiya to‘lashi mumkin

2027 yil 1 yanvardan boshlab, ishlab chiqarilganiga 30 yildan oshgan avtomobil egasi yiliga bir marta BHM 30 baravari (12 mln 360 ming so‘m) miqdorida ekologik kompensatsiya to‘lashi kerak bo‘ladi. Tegishli qaror loyihasi muhokama uchun e’lon qilindi.

Hujjat atmosfera havosini muhofaza qilish, ekologik barqarorlikni ta’minlash, aholi salomatligini asrash, transport vositalaridan chiqadigan zararli moddalar miqdorini kamaytirish, shuningdek, eskirgan avtomobillarni utilizatsiya qilish va ularning qismlarini qayta ishlashning samarali tizimini yaratishga qaratilgan.

Shuningdek, «zararli» ekologik toifaga kiritilgan transport vositasidan foydalanish va uni qayta ro‘yxatdan o‘tkazishni taqiqlash taklif etilmoqda. Bunday avtomobil (antikvar avtomobillar mustasno) davlat ro‘yxatidan chiqariladi. Loyiha muhokamasi 28 iyungacha davom etadi.

O‘qigan har bir kitob uchun mahkumning jazo muddati uch kunga qisqartiriladi

Jazoni ijro etish muassasasida saqlanayotgan mahkumning ma’naviy-axloqiy qadriyatlarga oid adabiyotlarni o‘qishi va o‘zlashtirishini baholashning yangi mexanizmi joriy etildi. Unga ko‘ra, test sinovidan muvaffaqiyatli o‘tgan mahkumning jazo muddati o‘qigan har bir kitobi uchun uch kunga qisqartirilishi mumkin. Biroq bir yil davomida qisqartiriladigan muddatning umumiy hajmi o‘ttiz kundan oshmaydi.

Hujjatga ko‘ra, Respublika Ma’naviyat va ma’rifat markazi, Alisher Navoiy nomidagi O‘zbekiston Milliy kutubxonasi hamda O‘zbekiston Yozuvchilar uyushmasi hamkorligida mahkumlar uchun maxsus adabiyotlar ro‘yxati shakllantiriladi va har yili yangilanadi. Mahkum o‘qigan kitobi bo‘yicha maxsus elektron tizim orqali test sinovidan o‘tadi. Test 100 ballik tizim asosida baholanadi va muvaffaqiyatli natija qayd etilishi uchun kamida 70 ball to‘plash talab etiladi.

Samarqandda YTH sodir qilgan Damas haydovchisi mashinadan tushib qoldi

Samarqand viloyatida Damas rusumli avtomobil haydovchisi boshqaruvni yo‘qotib, yuk mashinasiga urilgani aks etgan video tarqaldi.

Videoda haydovchi mashinasini yo‘lning asfalt bo‘lmagan chetki qismida katta tezlikda boshqarib, o‘zidan oldinda ketayotgan boshqa mashinalarni quvib o‘tishga uringani, ammo boshqaruvni yo‘qotib, yuk mashinasiga urilgani, haydovchi esa mashinadan tushib qolgani aks etgan. YHXX xabariga ko‘ra, holat 9 iyun kuni Paxtachi tumanidan o‘tgan M-37 avtomobil yo‘lida sodir bo‘lgan. Ta’kidlanishicha, Damas rulida bo‘lgan 35 yoshli haydovchi tan jarohatlari bilan shifoxonaga yotqizilgan.

Holat yuzasidan surishtiruv harakatlari olib borilmoqda.