«Shunchaki yashash jonimga tegdi». Krasnodarda 19 yoshli talaba odamlarga pichoq bilan hujum qildi

Krasnodarda pichoq bilan hujum uyushtirilishi oqibatida bir kishi halok bo‘ldi va bir necha kishi jarohat oldi. Bu haqda Rossiya IIV rasmiy vakili Irina Volk xabar qildi.

«Yosh yigit savdo markazi binosida bir necha tashrif buyuruvchilarga pichoq bilan tan jarohati yetkazdi. Dastlabki ma’lumotlarga ko‘ra, bir ayol vafot etgan», deb yozdi u.

Xabar qilinishicha, u bolalar ko‘ngilochar markazi hududiga qo‘lbola portlovchi buyum ham uloqtirgan. 

Krasnodar o‘lkasi gubernatori Veniamin Kondratev jami besh kishi jabrlanganini ma’lum qildi. Ularga shifokorlar yordam ko‘rsatmoqda.

Mash Telegram-kanali ma’lumotiga ko‘ra, hujumni 19 yoshli talaba sodir etgan. Ijtimoiy tarmoqlarda tarqalgan videolarda u qilgan ishi uchun hech kim unga mukofot va’da qilmaganini, o‘z joniga qasd qilishni istaganini aytgan.

«Shunchaki yashash jonimga tegdi», degan u qo‘lga olinganidan so‘ng.

Unga nisbatan sud-psixiatriya ekspertizasi tayinlangan.

Prokuratura tekshiruv boshlagan, tergov qo‘mitasi esa jinoyat ishi qo‘zg‘atgan.