Odamlar turmushini yaxshilashga qaratilgan o‘zgarishlar o‘n yillab cho‘zilmasligi kerak - Saida Mirziyoyeva

Prezident Administratsiyasi rahbari Saida Mirziyoyeva Andijon viloyatiga tashrif buyurdi.

«Bugun Andijon viloyatida zudlik bilan e’tibor qaratilib, yangilanishi talab etilayotgan bir nechta obektda bo‘ldik.

Oltinko‘l tumanidagi “Ko‘makay” oilaviy poliklinikasini ko‘zdan kechirdik. Ushbu binodan 1988 yildan buyon foydalanib kelinmoqda, u bugungi kun standartlaridan ancha orqada qolgan.

Shuningdek, 9-sonli bog‘cha va 36-sonli maktabda ham bo‘ldik. Bog‘cha 1970 yillarda qurilgan oromgoh o‘rnida joylashgan. Maktab binosi undan ham eski — 1960 yilda barpo etilgan bo‘lib, sig‘imi o‘quvchilar soniga mos kelmaydi. Har ikki obekt yangidan quriladi.

Gap tibbiyot va ta’lim haqida ketar ekan, shifokor va o‘qituvchining ish joyi, yaratilgan sharoit, farzandini maktab yoki bog‘chaga kuzatayotgan ota-onaning ko‘ngli to‘q bo‘lishi — eng muhim, birinchi galdagi masaladir. Odamlar turmushini yaxshilashga qaratilgan o‘zgarishlar o‘n yillab cho‘zilmasligi kerak. Jarayonni tezlashtirish, aniq va sezilarli natija tez fursatda amalda ko‘rinishi lozim», deb yozdi u ijtimoiy tarmoqlardagi sahifasida.