Charlz III Britaniya monarxlari orasida birinchi bo‘lib soliqlarini e’lon qildi

Buyuk Britaniya qiroli Charlz III o‘z daromadlari va to‘lagan soliqlari haqidagi ma’lumotlarni ixtiyoriy ravishda oshkor qilgan birinchi Britaniya monarxi bo‘ldi.

Foto: REUTERS/Henry Nicholls

Bukingem saroyi ma’lumotlariga (.pdf) ko‘ra, 2024-2025 soliq yilida u 12,9 million funt sterling (17 million dollar) to‘lagan. Shu tariqa, monarx Buyuk Britaniyaning 100 nafar eng yirik soliq to‘lovchilar qatoriga kirdi.

Shuningdek, 2024-2025-moliyaviy yil uchun shahzoda Uilyam daromad solig‘i va kapital o‘sishi solig‘i sifatida ixtiyoriy ravishda 7,76 million funt sterling (taxminan 10 million dollarga teng) to‘lagan.

Charlz III 2022 yil sentabr oyida taxtga o‘tirganidan beri qirol va uning to‘ng‘ich o‘g‘li shahzoda Uilyam tomonidan budjetga ixtiyoriy ravishda to‘langan soliqlarning umumiy miqdori (Buyuk Britaniyaning HMRC soliq xizmati orqali) 50 million funt sterlingdan oshdi.

Bukingem saroyining ta’kidlashicha, qirol Charlz III va shahzoda Uilyamning soliq to‘lovlarini tarixiy tarzda oshkor qilish monarx va uning merosxo‘rining shaxsiy tashabbusi bo‘lib, moliya ochiqligini oshirish kampaniyasi doirasida amalga oshirilgan.